Alibyo sa abuso

Sayod kita nga way magtiayon nga misulod sa kaminyuon aron lang magkabuwag. Subo man palandungon apan dul-an 50% niadtong nagpakasal wala makalahutay sa kinabuhing minyo. Kasagaran nagkabuwag tungod sa lain-laing abusong pisikal, berbal, emosyunal ug pinansiyal nga naagom.

Matod sa artikulo nga sinuwat ni Anne Peterson nga naguluhan og “10 Behaviors that can lead to Domestic Violence” dunay mga timailhang angay bantayan kon ang relasyon o panag-ipon dili na himsog.

Kining mosunod maoy angay bantayan aron malikayan ang dugang pang-abuso ug mahatagan og insaktong alibyo:

Una, ang pagyaga-yaga sa angga. Sa uyab pa, tam-is kaayo og tinawgan gikan sa Babe, Langga, Love, Honey ug uban pa apan human ma minyo, tamay na ang mogawas sa baba sama sa buang, animal, hinampak, pesti ug uban pa nga makapagamay ug makapaubos sa panan-aw sa kaugalingon ug dungog.

Ikaduha, kakuwang sa komunikasyon. Nagpuyo tuod sa usa ka balay apan way tingugay. Hilom pa sa parana. Mosamot kini ka lisod kon mo- walk out ug magpalayo ang pares.

Ikatulo, ang pagbuot-buot, pagkontrolar ug pagdemanda sa oras ug panahon. Maayo unta kon hinayon paghangyo ug dili bug-at, mahait, bastos ug sakit ang mga pulong nga makapatak-om sa kahadlok ug makahigot sa kagawasan.

Sunod, kanunay la'g away ug saway. Normal sa managtiayon ang panagbangi apan kon kini magsige bisag way klarong tinubdan, ug way solusyon, delikado kining mosilaob dayon mobuto. Ang mahitabo, mokipot na lang sa baba ug mohilak sa hilom sa nagngolngol nga dughan ug di na maningkamot nga masulbad ang problema.

Ang kapait kay ang uban nga di kapugong, manghagis o manglabay og mga gamit ug butang. Samot kay ang uban manghadlok ug mang- torture gamit ang mahait nga hinagiban o pusil.

Sa katapusan, ang tumang pangabubho, selos ug way basihang pamasangil sama sa pagpangukoy, basa og text, suwat nga makapawala sa respito ug pagsalig.

Kon kini mahitabo, biya ug itaho gilayon sa awtoridad aron matabangan.