Kalbaryo sa N. Bacalso highway

Sayon ra ang pag-ingon nga aron makalikay sa problema sa trapiko kinahanglan nga mosayo. Mao ni ang akong nadunggan gikan sa ubang motorista ug pasahero sa dihang nasugamak na sab og laing kahuot sa bul-og sa trapiko sa dihang gisugdan sa contractor ang stage 2 sa underpass project sa Natalio Bacalso Avenue sa Cebu City niadtong Lunes Nobiyembre 13.

Nahimong embudo ang eskina sa F. Llamas St. ug N. Bacalso kay one lane ra'y agianan sa mga sakyanan gikan sa Cebu South padung sa downtown. Niabot sa Kinasang-an Pardo ang kutay sa mga sakyanan nga nagsinardinas pagpaabot sa ilang turno nga makasud sa

one lane nga karsada. Unya'g ka hapon mobali sab ang sitwasyon. Magsinardinas ang mga sakyanan nga magpaabot sa ilang turno nga makasud sa dalan Gansiang agi anang mga eskina padung sa Barangay Hall sa Mambaling ug dalan Caimito. Tungod niini daghan sa mga sakyanan ang nilihay. Mao nga natrapik na sab ang karsada nga nagdugtong sa Barangay Cogon Pardo padung sa Mambaling. Gani ang ubang jeep de pasaheroan gikan sa Bulacao ug Pardo adto naman moagi didto. Wa pa ni labot sa daghang pribadong sakyanan nga nisud didto. Nagsinardinas gihapon kay gawas nga gamay ang karsada libaongon pa gyud ang pipila ka bahin. Gisaaran na ni kaniadto nga ayuhon apan kutob ra man sa pag-ayomayom.

Mao nga pag abot sa sagunson nga ulan, nibalik ra sab ang dagkong lungag. Dunay mga motorista nga nilihay padung sa South Road Properties ug Quiot padung sa Labangon ug Banawa, apan mao lang gihapon ang ilang nasugatan nga problema. Kon naa pa lay karsada nga mokonektar gikan sa Bulacao padung sa bukid lahos ngadto sa Busay deretso sa Mandaue City o sa Consolacion kay maayo kahang katkaton. Unsay kapuslanan nga moagi pa man ka og Cebu City sa mga mobiyahe padung sa Opon o Danao City. Gisultian ko ni Department of Public Works and Highways (DPWH) Secretary Mark Villar sayo ning tuiga nga gipundohan na sa nasudnong kagamhanan ang pag-abli og bag-ong karsada gikan sa Naga City padung sa Danao agi sa kabukiran. Mao ni sulbad paglikay sa trapik sa mga motorista para sa Norte. Manghinaot ta nga masugdan na ni aron makaginhawa na ta og luag.

SUGYOT

Epekto sa kahuot sa trapiko sa eskina Natalio Bacalso Ave. ug F. Llamas St. mao ang pagkatanggong sa mga pasahero matag buntag. Kini tungod kay ang mga PUJ nga mohakot nila dugay man makabalik. Ang mga Kaoshiung bus kaha ang motabang og hakot. Sugyot ra ni kung mahimo aron malikayan ang kalisod sa sakay.