Palabwanay, binaslanay
Gawas sa kinihaay ug ginukdanay tali sa Bando Osmeñ Pundok Kausway (BOPK) ug Team Rama, nag-iyahay og pasanginlanay ug palabwanay. Pastilan ning pamulitika makalangay sa panerbisyo, kalamboan ug tingusbawan.
Gimandoan ni Mayor Tomas Osmeña si kanhi mayor Mike Rama ug mga sakop sa Local School Board sa pag-uli sa P81.6M nga gi- disallow sa COA kabahin sa COLA sa 5,000 ka mga magtutudlo. Gitaktak kadtong well-trained nga job
order employees sa Cebu City zoo nga pinasulod ni Rama hinungdan nga gisirhan ug gidonar ang mga mananap sa gibuksan nga zoo sa Amlan, Negros Or. Mibasol ni Rama ug Konsehal Joy Pesquera nga midala sa kaso sa Court of Appeals ug Supreme Court nga
gipasaka ni Roque Ting kabahin sa tunga ka ektarya nga naapektohan sa kaugmaran sa SRP nga nakabayad na hinuon ang kagamhanan og P57M inay P12M ra unta sa lower
court. Gibawian og duha ka ambulansya si Apas Barangay Capt. Ramil Ayuman. Gisupak ang katukoran sa 300- megawatt coal fired thermal power
plant sa Ludo Power Corp. sa Sawang Calero bisan dakong uyon ang taga Sawang Calero, Suba, Pasil, Pahina San Nicolas ug Duljo-Fatima. Wala hatagi og P5,000 communication allowance ang piniling mga opisyal agig balos nga gibabagan sa konseho ang gipangayong P22 mil alang sa kagamitan sa iyang buhatan. Seryosong pasangil nga drug ug gambling protector ang nagpasilong sa Team Rama nga sila si Barangay Capts. Ar- iel Yburan sa Sawang Calero, Julius Guiguio sa Pasil ug Imok Rupinta sa Ermita. Gipalabwan ni Osmeña ang programa sa maayong panglawas ug nilusad sa Long-Life Medical Assistance Program paghatag og libreng tambal. Gidobli ang assistance sa mga nasunogan gikan sa P10 mil ngadto sa P20 mil. Dakong plastic sa basura ilisan og sardinas ubos sa programang “Basura Mo Sardinas Ko.” Gipatugbaw nga pinaagi ni deputy mayor Jerry Guardo ug Phinma nga dakog yuta sa Sambag 1 ug 11, ablihag karsada ang sudlonong bahin sa B. Rodriguez padulong sa Private Road ug Osmeña Blvd. padulong V. Rama Ave. Loan sa LBP nga P3 bilyones alang sa drainage, roads ug infra projects bisan gisupak kay maoy ipagamit ang halin sa South Road Properties (SRP).
Agi'g balos, gipanday ni Konsehal Joel Garganera ang resolusyon nga pasirhan ang v-hire terminal sa Kamagayan kay walay aprobal sa Terminal Accreditation Committee ug walay pagtugot sa konseho.
Gipasirad-an ni Rama kadtong City Link terminal sa N. Bacalso Ave. nga gipanag-iya sa kaliwat ni Osmeña kay wala kabayad. Si Garganera nihingalan og bakakon ni Osmeña human nipahibalo nga nilambo ang koleksyon sa basura nga nakadawat og award gikan sa EMB7. Gitumbok kadtong biyahe ni Osmeña sa South Korea pagtuon sa BRT kabahin diay sa pagpalagpot ni President Duterte nga giingong nag-abot nila ni Vice President Leni Robredo ug Sen. Antonio Trillanes.