PSYCH FIRST AID SA USC
Gitangan sa Psychology Department sa University of San Carlos (USC) og psychosocial services ang mga bakwit gikan sa Marawi -- nga nagusbat sa bag-ohay lang nga gubat -- samtang anaa sa dakbayan sa Cagayan de Oro, agi og pakigtambabayong sa kagamhanan sa pagpabarug og balik sa dapit.
Gipahigayon sa 15 nga delegasyon nga gilangkoban sa mga magtutudlo ug graduate students ang psychological first aid alang sa mga 90 ka bakwit nga nanimuyo sa pagkakaron sa Cagayan de Oro National High School.
Gipasingunhan ni Dr. Glenn Glarino, chairman sa departamento, mibansay sab ang mga taga-USC sa mga magtutudlo sa maong tulunghaan kung unsaon pagtanyag og mga psychosocial nga pag-abag sa mga bakwit.
Kasagaran mga tinun-an sa hayskul uban sa ilang mga ginikanan, nakadawat sila sa psychological first aid nga paagi sa pagtabang nila nga mga biktuma sa krises.
Gikinahanglan ang psychosocial services, sama sa psychological first aid, alang sa paghupay sa mga negatibo ug nakahigawad nga mga kasinatian, mipasabot si Glarino.
Ang maong mga kasinatian mahimong makatandog sa kaugmaran alang unta sa kaayohan ug mga umaabot unta nga kauswagan sa mga biktima sa trahedya sama sa armadong kagubot, siya midugang.
Nagsugod ang paglikos sa Marawi pagka-Mayo ni’ng tuiga sa dihang giatake ang maong dapit sa armadong grupo, nga gitawag og Maute nga mipadayag og pagka-maunongon ngadto sa Islamic State, ug gisulayan nga pagtukod og usa ka salipdanan.
Milungtad og lima ka bulan, midangat ang pag-ataki sumala sa mga nataho sa kamatayon sa halos usa ka libo nga mga sakop sa Maute ug gatosan sa panig sa kagamhanan, nga nakapugos sa libuan ka mga sibilyan nga mamakwit na lang.
Gikatahong may pipila sab ka mga sibilyan ang nangamatay atol sa pagpangatake, lakip na sa mga namatay tungod sa sakit nga wala na matagad og maayo samtang didto sila sa evacuation areas.