GSW KAGING SA CELTICS

Ningbangon gikan sa 17 puntos nga pagkalubong ang host Boston Cetlics aron pakagingon ang defending champions Golden State Warriors, 92-88, kagahapon sa National Basketball Association (NBA).

Gimugna ni Kyrie Irving sa 4th quarter ang 11 sa iyang kinatibuk-ang 16 puntos aron hingpit nga giyahan ang pagbangon sa Celtics, nga ning-inat sa ilang sunodsunod nga kadaugan ngadto sa 14 human sila nasubhan og duha ka mga pilde.

Ang Celtics maoy nagputol sa pito ka sunodsunod nga kadaugan sa Warriors, nga nahagbong sa 11-4 nga rekord.

Ang Warriors unang mingratsada ug nakamugna kini’g 17 puntos nga labaw sa 2nd quarter apan human niini, ningpasutoy og 15-3 nga rally ang Celtics aron pahakan ang labaw, 42-47.

Giinat pagbalik sa Warriors ang ilang labaw ngadto sa 5643 pinaagi sa 9-1 run unya ilaha pa kining giinat og balik ngadto sa 17 sa 3rd quarter.

Apan nailog sa Celtics ang labaw pinaagi sa makabungog nga 19-0 nga rally sa pagpangulo nila ni Jaylen Brown ug Irving human sa 3rd quarter.

Human niini, nagpulipuli na paggunit sa labaw ang duha ka mga kampo apan wala molubad ang Celtics hangtod sa hingpit nilang kadaugan.

Gipangulohan ni Brown ang kadaugan pinaagi sa iyang 22 puntos samtang nidugang og 18 puntos si Al Horford.

Ang Warriors gipangulohan ni Kevin Durant pinaagi sa iyang 24 puntos, niamot og 13 puntos si Klay Thompson samtang nagkagidlay ang duwa ni Stephen Curry ug igo lang kining nakamugna og siyam ka puntos.

Alang kang Curry, dili malikayan sa bisan kinsa nga magduduwa nga makasugat kini og ngil-ad nga duwa.

“It was just one of those nights,” matod sa two-time MVP.