PANGANDOY NAKAB-OT NA
Melindo moaway’g unification bout
Natuman na ang pangandoy ni International Boxing Federation (IBF) junior
flyweight champion ALA fighter Milan Melindo nga makaaway alang sa usa ka unification bout.
Ang gitawag og El Metodico makigharong kang World Boxing Association (WBA) jr. flyweight champion Japanese Ryoichi Taguchi karong Disyembre 31 sa Tokyo, Japan.
Opisyal kining gipahibalo ni ALA Promotions president Michael Aldeguer sa usa ka press
conference kagahapon sa udto sa Casino Español nga gidungan pag-broadcast sa Japan.
Nagkanayon si Aldeguer nga aron hatagan og katumanan ang pangandoy ni Melindo, gisagubang nila ang labing lisod nga negusasyon. “This is the hardest negotiation we ever had,” matod ni Aldeguer.
Gipasabot ni Aldeguer nga nakahatag nila og dakong problema sa negusasyon mao ang kabahin sa miaging away ni Melindo diin nadepensaan niya ang iyang world title pinaagi sa kontrobersyal nga split
decision batok kang South African Hekkie Budler niadtong Septiyembre 16 sa Waterfront Hotel sa Lahug, Cebu City.
Ang kampo ni Budler mipasaka og opisyal nga reklamo sa IBF nga dili makiangayon ang resulta sa away.
Nakita sa IBF nga adunay basihan ang reklamo sa kampo ni Budler ug nipagawas kini’g kamanduan alang sa dinaliang rematch.
Hinuon asoy ni Aldeguer nga natugotan sila sa IBF nga dili una makig-away og balik si Melindo kang Budler aron mahan-ay ang unification bout tali nila ni Melindo Taguchi.
Nahangyo sa ALA Promotions ang IBF pinaagi sa kasabutan nga ang modaog nila ni Melindo ug Taguchi maoy makigharong kang Budler. Nauyonan kini sa tanang mga nangahilambigit.
“We had a very hard time in this negotiation because of the issue of Budler. But we made an agreement that whoever wins in the December 31st will fight Budler,” pasabot ni Aldeguer.
“The dream of Milan has always been a unification bout, so we have to work really hard for this fight.” Si Milendo, kinsa nahimong
world champion pinaagi sa impresibong 1st round TKO nga kadaugan batok sa kababayan ni Taguchi nga si Akira Yaegashi niadtong Mayo 21 sa Japan, nipadayag sa iyang kaandam nga moasdang pagbalik sa Japan sa tinguhang usahon ang IBF ug WBA junior flyweight titles.
Sa iyang pagkumpara, nagkanayon si Melindo nga parehong dekalidad nga mga boksidor sila si Yaegashi ug Taguchi apan masaligon siya sa iyang kapabilidad.
“Both Japanese fighters are very good and strong kay dili man na sila mahimong world champion kon dili na sila maayo,” matod ni Melindo.
“But I have a lot of confidence to myself because I have faith in God.” Alang kang ALA stable
head trainer Edito Villamor, kinahanglang madominar ni Melindo si Taguchi ug dili molugak bisan gamay sa kinatibuk-ang away.
Hinuon gitataw ni Villamor nga wala sila nabalaka sa posibleng hometown decision gumikan kay wala naila kabahin niini ang Tokyo, Japan.
“Sukad pa man sa una, fair man gyud hinuon ang decision sa Tokyo pero kinahanglang dili gyud mokompiyansa si Milan aning awaya,” pasabot ni Villamor.
Si Melindo naggunit og 37-2, 13KOs nga rekord samtang si Taguchi naghupot og 26-2-2, 12KOs nga baraha.