Di duguon nga drug war ubos sa PDEA
Mokabat sa 6,225 ka mga drug-related nga kaso sa pagpatay ang natala sa Philippine National Police (PNP) gikan sa pagsugod sa gubat kontra drugas niadtong Hulyo 1 sa miaging tuig hangtod sa Septiyembre ning tuiga.
Mao kini ang panahon nga ang PNP mao pa ang nagdala sa gubat kontra druga.
Gibalhin kini ngadto sa Philippine Drug Enforcement Agency (PDEA) sa buwan sa Oktubre.
Matod pa sa PDEA, ilang gipatuman ang usa ka “lessbloody, high impact” nga gubat kontra druga, bisan pa sa kakuwang sa ilang pundo ug mga ahente. Ang PNP adunay mokabat sa 170,000 ka mga uniformed ug non-uniformed personnel. Samtang ang PDEA adunay. 1,041 ka mga field operatives sa tibuok nasod.
Ang PDEA adunay budget nga P1.44 bilyunes karong tuiga. Ang Senado naglaraw nga umentohan kini ngadto sa P2.6 bilyunes sa sunod tuig.
Kon ang PDEA na lang gyud ang tugyanan sa gubat kontra druga maayo tingali nga dugangan sab ang ilang field operatives.
Ang PDEA nakasikop og kapin sa 400 ka mga drug personalities sa 1,341 ka mga operasyon nga ilang gihimo sukas sa Oktubre 10. Nakasakmit usab sila og balor P53.83 milyunes nga illegal nga drugas.
“Failure is never an option when we took upon the sole authority in bringing order to (the) country’s antidrug campaign,” matod ni PDEA Director General Aaron Aquino.
“We may be undermanned, underequipped and underfunded, but we continually strive to achieve more than what is expected,” matod pa niya.
Apan nganong maingon man nga mas di duguon ang gubat kontra druga nga gipatuman sa PDEA?
Sumala pa sa maong ahensiya, usa ra ka drug personality ang ilang napatay sa kapin sa usa ka libo ka mga operasyon.
Sa PNP, daghang napatay kay daghang nisukol.
Sa PDEA usa ray nisukol.