Viva! Birhen sa Regla

Wala ug tuo nga imbitasyon ang pahimuslan karong adlawa ug ugma alang sa mga mamistahay sa Lapu-Lapu City. Kini atol sa kapistahan sa ilang pangilin Birhen sa Regla. Di ikalimod ang ilang kapistahan maoy usa sa labing dugokunon alang sa mga mamistahay.

Nag-una nga rason mao ang ilang mga saaran ngadto sa patron. Ikaduha na kasiguro ang makabuhong nga kumbira nga idalit ngadto sa mamistahay. Matag piyesta usa nahiuna nga hisgutanan mao ang sitwasyon sa trapiko.

Matod ni Mario Napule, pangulo sa Lapulapu City Traffic Management System, ang karsada sa palibot sa simbahan mapaabot nga maoy labing hagip-ot.

Hinuon, duna sila’y giandam nga lapad nga parking

area nga di ra sab layo sa simbahan. Palihug nalang sa pagpangutana sa mga traffic

enforcer nga inyong maagian aron mo matultulan. Mas bentaha nga mosayo kamo.

Sa mga mag- ferry o magjeep, ayaw kalimot sa pagdala og payong panagang sa ulan ug init. Mahitungod sa siguridad, sama sa naandan mas maayong likayan ang pagdala og hait nga butang o hinagiban nga mobuto aron di mapuwerhisyo.

Ang kapulisan nipasidaan sa mga badlungon. Nakatutok ang wa mag-uniporme sa mga mangunguot ug manimpohay. Wa pa ni labot sa mga closed-circuit televesion (CCTV) camera nga gimontar sa pribadong establismento.

CARENDERIA

Si Lapu-Lapu City Health Officer Dr. Rodolfo Berame nitug-an nga ilaha na nga napahigayon ang inspection sa mga carenderia ug ubang kan-anan sa maong siyudad. Kini agi og pagsiguro nga ang mga baligya nga pagkaon luwas alang sa mga customer. Mas daghan baya ang modugok sa kapistahan nga makaapil sa kumbira. Pananglit kadtong mga way kaila ug ang tuyo mao ra gyud ang pagpanagkot, sa carenderia o restawran ang ilang puntarya. Importante kaayo ang luwas nga pagkaon kay di sayon nga maglain ang imong tiyan nga naa ka usa ka fiesta. Bisan sa mga nagkumbira kinahanglan nga masiguro nga di sakitan sa tiyan ang mga bisita. Sa mga dayo sama nianang nanunggo nga mga pumpboat gikan sa mga isla, nagbawon sila og lutuonon.

Ang ubang putahi sa merkado sa Opon na paliton. Nakaapil man gani ko kausa og sawo og paniudto sa mga taga Leyte nga namista nidunggo duol sa simbahan. Alegri sab kay kumpleto man sa lutoanan ang ilang pumpboat. Way kalainan sa nagkumbira kay kuyog man sab nila ang ilang pamilya. Tungod kay may saaran man sila sa Birhen mao nga matag piyesta modumdum sila pagsimba ug pagpanagkot. Happy fiesta! Viva, Birhen sa Regla!