Don’t go away

Wa gyud dayon ko makatingog sa gisulti ni Greg. Nakatutok ko niya. Gusto kong isipon nga nagkomedya lang siya. Apan seryuso siya.

“Gusto kong mosu’od sa seminaryo, Paula. Ang akong uyoan nga pari nga tua sa Manila maoy mogasto nako.”

“Daan ba nimo ning giplano kaniadto pa, Greg? Nakatingog ra gyud ko. Morag gusto kong mohilak. “Wa koy plano ani kaniadto, Paula. Nakaila bitaw ka nako kaniadto sa gagmay pa ta? Siawan ug maldito ko. Karon lang bag-o nga nasu’od ni sa akong hunahuna ug kasingkasing.”

“Segurado ka ba gyud ani, Greg?”

“Sure ko, Paula. Ang pagsilbi ko sa Diyos maoy akong

destiny ning kinabuhia. Kanunay kong gipadamgo bahin ani. Gitawag ko sa Diyos.”

Igo na lang kong nakapanghupaw. Unya nakigpamauli na si Greg. Iya kong gihatod sa gisak-an kong boarding house. Pagsulod ko sa akong kuwarto, wa na gyud ko makapugong sa akong kaugalingon.

Nakahilak na gyud ko samtang giumod ko ang akong nawong sa unlan sa akong higdaanan. “Pagkapait aning akong

lovelife, uy!” Hilom kong nakaingon.

Nahunahuna ko sila si Xander ug Greg. Una kong gimahal si Xander. Apan mibiya siya nako kay misulod sa PMA.

Secret love ko siya. Ug karon sa wa ko lang damha, nahigugma ko kang Greg. Secret love gihapon nako siya. Apan moadto siya sa Manila aron mosulod sa seminaryo. Biyaan ko niya.

Mibangon ko. Nagpamahid ko sa akong mga luha.

Unya nahunahuna ko si Nestor, ang lalake nga nahigugma nako apan wa ko higugmaa. Nganong ingon ani ang nahitabo? Kinsa tong mga lalake nga akong gimahal, mibiya nako? Ug duna untay lalake nga nahigugma nako, apan wa ko higugmaa.

Nanglabay ang mga adlaw. Inanay kong naka- move on sa pagbiya ni Greg nako. Mao sab ni ang akong gibati ngadto kang Xander. Gisakitan ko sa iyang pagbiya nako. Apan sa kadugayan, nadawat ko nga di siya ang lalake nga para nako. Ug angay ko na lang sab hunahunaon nga si Greg di sab ang lalake nga akong destiny.

Sa matag kakita ko kang Nestor, magul-anon siya. Apan magkaestoryahay gihapon mi labi na gyud kon magkakuyog mi paingon sa eskuwelahan. Gihunahuna ko na lang, nga kon si Nestor ang lalake nga para nako, moabot ang panahon nga mahigugma na ko niya. (KATAPUSAN)