GSW GILUBO'G 22 MIDAOG GIHAPON

Nakabawi ang Golden State Warriors gikan sa grabe ka ngil-ad nga 1st half aron lupigon ang host Philadelphia 76ers, 124-116, kagahapon sa NBA.

Gipakuratan sa Sixers ang defending champions pinaagi sa paghakot og 47 puntos sulod lang sa 1st quarter kumpara sa 28 puntos lang nga napupo sa Warriors.

Nagpadayon ang kainit sa Sixers sa 2nd quarter hangtod nga nainat nila ang ilang labaw ngadto sa 74-52 sa halftime.

Sa pagpangulo nila ni Stephen Curry ug Kevin Durant, ang Warriors ninggukod sa 3rd quarter diin nakabawos sila pagmugna og 47 puntos.

Sa 3rd quarter,ang gimugna ni Curry ang 20 sa iyang kinatibuk- 35 puntos, nga maoy labing dako nga nahimo sa usa ka magduduwa ning maong kombati.

Nidugang og 27 puntos si Durant alang sa Warriors, niamot og 17 puntos si Klay Thompson samtang nihatag og 14 puntos si David West.

Grabe ka paspas ang paggukod sa Warriors gikan sa 22 puntos nga pagkalubong sa halftime diin pagkahuman sa 3rd quarter, sila na ang naglabaw og 10 puntos, 99-89.

Human niini, kontrolado na sa Warriors ang duwa ug wala na kini motugot nga makasugat pa og pagpanghudlat gikan sa Sixers hangtod na katapusang gutlo.

Ang grabe ka hugot nga depensa sa Warriors mao ang nagpabuhi sa ilang paglaom sa 3rd quarter ug gumikan niini, mihanoy na ang ilang opensa.

Si Draymond Green nakadayeg sa gipakitang kinaiya sa iyang mga kauban niadtong higayon nga nagsalimoang sila sa 1st half.

Ang Warriors mitali og 12-4 nga rekord samtang ang Sixers nahagbong sa 8-7 nga baraha. Gipangulohan ni Ben Simmons ang Sixers pinaagi sa iyang 23 puntos, nidugang og 21 puntos Joel Embiid.

Sa laing mga duwa, ningdaog ang Charlottebatok sa Clippers, 102-87, Utah Jazz batok Orlando, 125-85, Houston batok Memphis, 105-83, Dallas Mavericks batok Milwaukee Bucks, 111-79, ug Portland Trail Blazers batok Sacramento Kings, 102-90.