2 ka adlaw nga Children's game natapos kagahapon
Napuno sa katawa ug hudyaka sa mga bata ang duha ka mga adlaw nga Children’s Games Sports for Peace nga programa sa Philippine Sports Commission (PSC) nga nahuman kagahapon sa Cebu City Sports Center.
Nagkanayon si PSC Commissioner Ramon Fernandez nga dul-an sa 2,000 ka mga bata gikan sa nagkadaiyang mga barangay sa dakbayan sa Sugbo lakip na ang naa sa bukiran nga bahin nisalmot.
Ang kalihukan gituldokan pinaagi sa pagsayaw sa tanang partisipanteng mga bata sa sikat nga tukar nga giulohan og Baby Shark.
“These Children’s Games is your first step towards becoming an athlete. Work hard to become an athlete and earn scholarship so that you can help your parents and yourself as well. You should make Olympian Joy Tabal as your inspiration, became like her and everything on your future will be good,” asoy ni Fernandez ngadto sa mga partisipante.
Sa 80 ka mga barangay sa dakbayan, 58 ang adunay mga representante. Nangapil sab ang mga bata sa Muslim communities ug Street Children Parian Drop In Center.
Gipasabot ni Fernandez nga nakab-ot nila ang ilang tuyo ug tumong sa pagpahigayon ning maong kalihukan nga mao ang paghatag og kahigayunan sa mga bata nga makighugoyhugoy sa usa’g usa.
Ang mga bata ningsalmot sa duwa sa basketball, volleyball, swimming, athletics, gymnastics, archery, judo, air rifle shooting, boxing, karatedo, arnis, badminton, table tennis ug weightlifting events.
Ningduwa sab ang mga bata og parlour games ug indigenous Filipino games.