CONGRATS, JERWIN
Sulod sa upat ka mga higayon nga gitumba ni Filipino Jerwin Ancajas si British Jamie Conlan aron depensaan ang iyang International Boxing Federation (IBF)
super flyweight title pinaagi sa impresibong 6th round TKO nga kadaugan kagahapon sa SSE Arena sa Belfast, Ireland.
Sa usa ka talagsaong hitabo, si Conlan, kinsa natagak sa 19-1, 11KOs nga rekord, kalit lang natumba sa 1st
round bisan wala kini maigo sa kumo apan gituohan nga usa kini ka grabe ka langan nga reaksyon.
Sa iyang pagkatumba, gituohan nga nakasinati og pagkaangol sa iyang tiil apan nibarog ra kini pagbalik ug wala’y nakitang senyales nga naangol ang tiil niini.
Sa 2nd round, nagisian ang kanhi wala’y pildeng si Conlan sa ibabaw nga bahin sa iyang wa nga mata apan nakasukol ra kini’g binayloay og mga kumo.
Natumba na sab pagbalik sa 3rd round si Conlan human naigo sa body shots ni Ancajas. Nakabarog ra hinuon og balik si Conlan ug nakatiwas sa round.
Sa ikatulong higayon, natumba na sab si Conlan sa hinapos nga bahin sa 4th round gumikan gihapon sa
body shots ni Ancajas. Si Ancajas, kinsa misaka sa 28-1-1, 19KOs nga rekord, gikuhaan sa referee og usa ka puntos human kini nakabuhi og low blow.
Sa interbyu sa www.rappler.com, ang manager ug sa samang higayon trainer ni Ancajas nga si Joven Jimenez nagkanayon nga nahadlok sila niadtong higayuna nga ma- disqualify ang ilang batos.
Tungod niini, asoy ni Jimenez nga iyang gimanduan si Ancajas nga dili na motira og low blow.
Tuod man, gituman ni Ancajas ang mando ni Jimenez ug sa 6th round, usa ka piktos nga tuong kumo ni Ancajas nga miigo sa kilid nga bahin sa ulo ni Conlan ang nagpatumba og balik sa British fighter.
Ning higayuna, giundang na sa referee ang away aron ilikay si Conlan sa dugang pa’ng kastigo.
Si Ancajas usa ka boksidor sa MP Promotions nga gipanag-iya ni Filipino boxing icon Manny Pacquiao.
Ang matchmaker sa MP Promotions nga si Sean Gibbons, sa sayo pa, mibutyag nga ang 25-anyos nga Ancajas adto na moasdang sa United States sa sunod niyang away samtang ang manager niini nga si Joven Jimenez nagtuo nga sa bulan sa Pebrero ang sunod sa iyang batos.
Tinguha karon sa ilang kampo nga paawayon si Ancajas sa usa ka unification bout batok ni WBO 115- pound champion Naoya Inoue.
Sa maong away, si Ancajas adunay $80,000 nga premyo ug usa siya sa tulo ka kasamtangang world champions sa Pilipinas uban nila ni Donnie Nietes ug IBF junior flyweight titleholder Milan Melindo.