2 KA BATA, 10 KA TAWO GILUWAS

LUNA GIKORAL; TALISAY POLICE, SOCIAL WELFARE MIRESPONDE

Kapulisan sa Talisay, uban sa mga tinugyanan sa City Social Welfare and Services (CSWS) ningluwas sa duha ka mga bata, uban ang ilang inahan ug 10 ka mga kawani sa Spider Taxi kagahapon sa alas 10 sa buntag.

Duha na ka semana sila nga nangatanggong sulod sa ilang gitrabahoan human gikoral ang ilang agianan sa tag-iya sa luna atubangan sa ilang gitrabahoan sa sitio Oregano, Barangay Lawaan 2, dakbayan sa Talisay. Si Sandy Aranas, security adviser sa Spider Taxi, ningdangop sa kapulisan human ang caretaker sa garahianan sa mga taxi gusto nang mobiya sa lugar.

Apan di sila makagawas human nga ang kasikbit nga luna nga gipanag-iya ni Daniel Go diin adto sila moagi gikoral.

Adunay duha ka mga bata nga nalakip sa pagkatanggong ug nasakit uban sa ilang inahan gumikan kay nagpuyo ang caretaker nga maoy amahan sa mga bata.

Sa dihang niabot sila sa dapit, ilang naabtan sa sud ang 4 anyos nga batang babaye ug usa ka tuig nga batang lalake, mga binuhi nga hayop ug ang 10 ka mga hamtong.

Matod ni Angel Tamban, asawa sa caretaker, nagkanayon nga duha ka mga semana na silang nangatanggong sa garahian sa Spider Taxi ug nagpakitabang na sila tungod sa kalisod sa ilang kahimtang nga di sila makagawas.

Gani iitsa na lang ang ilang pagkaon gikan sa gawas. Si Johndry Pajuay, field supervisor sa Spider Taxi, nipasabot nga gusto unta silang mobiya apan anaa ang ilang trabaho sa sulod.

Kon ila usab nga biyaan, tingali usab unya og adunay mawala ug sila ang basulon.

Ila nang gitawgan ang tag-iya sa ilang gitrabahoan nga gusto na silang mobiya ug i- rescue sila. Samtang si Ramil Gapol,

caretaker ni Go sa yuta, nipasabot nga sa wa pa gikoral ang yuta, sila nipahibawo sa mga nagpuyo sa dapit nga ila kining koralon, apan wa mamahawa ang mao nga mga tawo.

Di usab tinuod nga wa silay kaagian tungod kay napalit napalit na sa tag-iya sa Spider Taxi ang luyo nga yuta diin mahimo silang adto moagi.

Nagkanayon si Gapol nga kompleto ang ilang papales sa wala pa sila nagkoral sa luna.

Si Fe Bacaltos sa CSWD sa dakbayan sa Talisay niingon nga gi- rescue nila ang mga tawo lakip ang mga bata.

Apan nitataw siya nga wa siyay nakitang kalapasan sa nagkoral sa yuta tungod kay gipahibawo nang daan ang mga tawo sud sa luna nga kini koralon.

Duna pa unta silay higayon sa pagpahawa apan ilang gipili nga magpabilin.

Si PO1 Janet Marquez, sa Womens and Children sa Talisay City Police nibutyag nga ang ila lang mao ang pag-abag sa CSWD ug paghatag og kalinaw sa pag rescue.

Nagkagubot sila human si Go ang niangkon sa luna nga giokupahan sa Spider Taxi.

Matod ni Supt. Jason Villamater hepe sa Talisay Police Station nga away sa yuta ang maong kasungian ug silang mga pulis dili mahimong makahilabot. /