MAYOR GITAKTAK SA OMBUD

TUNGOD SA ‘PAG-USAB’ SA RESIBO SA GI-ORDER NGA PAGKAON

Wala pa gani mahuman ang iyang usa ka tuig nga suspensiyon tungod sa giingong pagpangrakrak og usa ka balay, laing problema ang giatubang karon ni suspended Dumanjug Mayor Efren Guntrano “Gungun” Gica.

Si Gica moapelar sa hukom ngadto sa Court of Appeals.

Ang Office of the Ombudsman nimando sa pagtaktak kang Gica sa katungdanan tungod sa serious dishonesty ug grave misconduct tungod sa isyu sa gipaburot nga resibo o bayranan sa usa ka restaurant niadtong 2014.

Giaprubahan ni Ombudsman Conchita Carpio- Morales ang desisyon sa Ombudsman Visayas sa pagtaktak kang Gica sa katungdanan.

Kini tungod sa pag-usab niini sa resibo sa kan-anan, diin siya nikaon kauban ang Association of Local Budget Officer human sa ilang seminar niadtong Abril 24-26, 2014.

Nagsugod ang kaso niadtong 2014 dihang si Gica ang acting mayor sa lungsod.

Duna siyay gi- cash advance nga P50,000 gikan sa panudlanan sa lungsod alang sa seminar sa ALBO sa dakbayan sa Sugbo.

Anaa na lang sa P28,000 ang iyang giuli sa iyang cash advance.

Sa iyang liquidation report, gipadayag ni Gica nga moabot sa P21,435 ang ilang nagasto sa pagkaon sa Chinese restaurant nga Ding Qua Qua.

Duna siyay gisuporta niini nga resibo, apan ang iyang kaatbang sa pulitika nga si kanhi mayor, Nelson Garcia, nakakuha og matod pa orihinal nga duplicate niini, diin nalatid nga P11,435 lang ang aktwal nga nagasto.

Gihimug-atan ni Garcia nga gibulsa ni Gica ang P10,000.

Gawas niini, iyang gikwestiyon ang pagkaon nga gi- order nga naglakip sa kalderetang kanding ug lasagna, nga dili kabahin sa orihinal nga menu sa Chinese restaurant.

Sa iyang depensa, si Gica nisumbalik pag-alegar nga si Garcia maoy ni-tamper sa mga dokumento nga iyang gisuporta sa liquidation report, dihang nabalik gikan sa iyang suspensiyon.

Gihimug-atan sab niya nga dunay tulo ka mga resibo nga iyang gisumitir nga maka- cover sa tibuok nga kantidad nga nagasto, apan nasuta sa Ombudsman nga wa kini makasuporta sa ALBO seminar nga nahitabo niadtong Abril sanglit Mayo ang date sa dugang resibo.

Ang wa pagsulti sa tinuod nga naggasto ug pag-tamper og mga dokumento gitumbok sa Ombudsman nga serious dishonesty samtang ang pagbulsa niini og P10,000, magpakita usab og grave misconduct.

Puros kini bug-at nga mga kalapasan base sa mga lagda sa Civil Service.

Subay sa iyang pagkatak-tak sa pwesto, ma- forfeit na ang tanang mga benepesyo, hingpit usab siya nga did-an nga makahupot og bisan unsang posisyon sa gobiyerno ug kanselado na ang tanang civil service eligibility niini.

Ang Department of Interior and Local Government (DILG) maoy gimanduan sa pagpatuman sa kamanduan.

Plano ni Gica nga moduso og apelasyon ngadto sa CA labot sa desisyon sa anti-graft office.

“Murag nawagtangan na ko’g paglaum sa Ombudsman, so ari na lang ko sa Court of Appeals,” niingon si Gica.

Sa miaging semana nadawat ni Gica ang kopya sa kamanduan, apan wa pa na- serve sa DILG ngadto kaniya.

Si Gica nag- serve og usa ka tuig nga suspensiyon tungod sa misconduct ug oppression human matod pa niuban siya sa usa ka police operation ug nangrakrak sa balay nga ilang gironda, apan iya kining gihimakak. /