Dissolution of marriage 'sama rag dibursyo'

“I take you as my husband/ wife, until further notice.”

Mao kini ang paghulagway sa pangu sa Matromonial Tribunal sa Archdiocese of Cebu sa plano nga ipalabang ang balaudnon nga House Bill 6027 o Dissolution of Marriage.

Matod ni Msgr. Raul Go, kinsa kura paruko usab sa St. Thomas de Villanueva Parish sa Pardo, nga usa ka pagguba sa cultural essence sa kaminyuon ang plano nga pagpasar sa maong balaudnon.

“Ang ilahang kaminyuon mao’y ilang assurance to each other that the relationship will last for a lifetime. Kon naa na ang dissolution, sa ato pa, ang kaminyuon is already until further notice, dili na until death. So, wala na, naguba na ang kaminyuon ba.”

Samtang si Cebu Archbishop Jose Palma, sa gipahigayon nga pontifical mass sa Nuestra Señora Virgen de Regla Parish National Shrine sa dakbayan sa Lapu-Lapu, nipahimangno niini kalabot sa epekto ngadto sa mga pamilya.

Kagahapon, naobserbahan ni Palma nga di hapit kahulgan og dagom ang simbahan sa Birhen sa Regla atol sa ika282nd feast sa Virgin of the Rule gumikan sa bagang duot sa mga deboto nga mitambong sa misa kagahapon sa buntag.

Nahimuot ang arsobispo sa kahugot nga debosyon sa mga tawo ngadto sa Birhen sa Regla.

Haom ang kasaulogan ilabi na sa titulo sa mahal nga Birhen nga Regla kon rule o balaod sa isyu nga gi-atubang mahitungod sa proposed bill nga Dissolution of Marriage.

Gipahinumduman ni Palma ang mga parokyano nga ang maong balaodnon nagsupak sa kabubut-on sa Diyos ug naghulga sa Kristohanong pagtulon-an nga ang kaminyuon sagrado.

“We need to retain and proclaim the wonderful teaching of God. Couple should try to live out that calling (marriage),” matod ni Palma.

Matod niya nga kabahin sa kinabuhing minyo nga adunay higayon nga di magkasinabot ang magti-ayon.

Angayan sab nga hunahunaon niadtong magtiayon sa mamahimong resulta sa higayon nga mosangpot sa panagbuwag ilabi na ngadto sa mga anak niini.

Samang si Go nihulagway nga giilisan ra ang termino nga “divorce” sa maong balaudnon nga dissolution of marriage nga mao ang nature niini.

Gipasabot niya nga lahi sa annulment diin aduna’y nakita nga depekto sa kaminyuon, ang dissolution of marriage, kon mapul-an na, modesider na lang og buwag.