Comelec miluwat og TRO pabor kang Diamante

Comelec Second Division niluwat og temporary restraining order (TRO) batok sa pagpatuman sa kamanduan sa korte alang sa pagpalingkod sa giingong mananaog sa mayoral race sa lungsod sa Tuburan niadtong 2016 nga si Daphne Lagon.

Ang kasamtangang mayor nga si Democrito “Aljun” Diamante nihangop sa desisyon sa Comelec.

Samtang si Lagon moapelar usab sa mao nga desisyon.

“Nalangay gyud. Mo-apelar pud mi. Mo- motion for recon mi hopefully tomorrow (karong adlawa) maka-file mi,” matod ni Lagon sa Superbalita Cebu.

Niluwat og TRO ang Comelec Second Division samtang wala pa niini hingpit nga maresolbar ang Petition for Certiorari ad Prohibition nga gisang-at ni Tuburan Mayor Democrito Diamante.

Niduso niini ang mayor human mihukom ang Toledo City Regional Trial Court (RTC) Branch 59 nga si Lagon maoy nidaog sa mayoral race niadtong 2016 elections, human usab ang recount nga gihimo sa korte.

Sa desisyon sa Comelec, gimando niini nga undangon ang pagpatuman sa naunang kamanduan ni Judge Hermes Montero niadtong Oktobre 25 nga palingkuron na si Lagon bisan kon dunay nagung-ong nga apelasyon si Diamante.

Gihangop ni Diamante ang desisyon ug subling nangangkon nga siya maoy tinuoray nga mananaog sa eleksiyon sanglit ang gipaubos sa recount sa korte, kadto lamang mga presinto diin nakadaog ang iyang kaatbang.

Gihatagan og 10 ka adlaw sa Comelec Second Division si Lagon pagtubag ug pagduso ug komentaryo labot sa nahimo nilang desisyon.