Dugang HIV/AIDS treatment hubs
Dugang tulo ka mga tambalanan ang gikatakda nga i- accredit sa Department of Health (DOH) 7 isip treatment hub sa human immunodeficiency virus/acquired immune deficiency syndrome (HIV/AIDS).
Kagahapon, usa ka panagtapok ang gihimo sa nagkadaiyang treatment hub sa Visayas ug Mindanao aron magtagbo ug mahisgutan ang kasamtangang problema ingon man hagit sa pagpalapad pa sa mga treatment hubs ug sattelite hubs.
Matod ni Dr. Van Phillip Baton, program coordinator sa HIV/AIDS sa DOH 7 nga tumong nila nga mamahimong unom ngadto sa pito ka treatment hubs ang anaa sa Central Visayas.
Kasamtangan nga accredited hubs nila kining Vicente Sotto Memorial Medical Center ug Cebu City Social Hygiene Clinic sa Sugbo; Gov. Celestino Gallares Memorial Medical Center sa Bohol; ug Negros Oriental Provincial Hospital diin naghatag kini sila og libre nga testing ug tambal.
Gibutyag usab ni Baton nga dugang tulo ang ilang i- accredit diin naglakip kini sa Eversely Childs Sanitarium sa Mandaue ug Talisay District Hopsital sa dakbayan sa Talisay.
Labing unang pribado usab nga treatment hub ang Visayas Community Medical Center.
Matod ni Baton nga anaa sa 500 ka mga tawo nga positibo sa HIV/AIDS ang ratio sa matag usa ka treatment hub.
Ang PhilHealth sa ilang bahin nipahibaw sa publiko nga nagkadako ilang pay out sa mga claim nga nipahimulos sa Outpatient HIV/AIDS Treatment (OHAT) package.
Niadto lang 2016, niabot sa P234 milyones ang pay-out nila sa OHAT lang lukop nasod.
Matod ni Dr. Israel Francus Parga, Vice President for Corporate Affiars sa PhilHealth, nga nagsugod sila niadtong 2010 niining package diin P200,000 lamang ang payment sa 50 kapin ka mga tawo nga nipahimulos sa serbisyo.
Karon niabot na sa kapin 35,000 ka mga tawo ang niavail sa OHAT.
Samtang gikan sa 14 ka treatment hubs sa nasod, niabot na kini karon sa 41.