Serbisyong medikal

Ang nahitabong lalis tali sa usa ka pasyente ug nurse sa Balamban Provincial Hospital (BPH), lungsod sa Balamban, lalawigan sa Sugbo dili pa lang dugay nga nag- viral sa social media, nagsamin sa kahimtang ug matang sa publiko nga serbisyong medikal sa lalawigan. Overworked ang health workers gawas sa kakuwang sa igong kahimanan sa pag-atiman sa panginahanglan sa mga pasyente.

Dili kita makahukom sa pagkakaron kon kinsay sad-an sa duha ka habig. Nagpadayon pa ang imbestigasyon sa kaso nga gihimo ni Dr. Olivia Dandan, hepe sa BPH, ug Provincial Health Office (PHO) ubos sa pagpangulo ni Dr. Rene Catan. Ang nurse nisang-at na og kaso sa korte batok sa gikaaway nga pasyente nga si Cynthia Kiamco, kinsa usa ka magtutudlo.

Base sa nag- viral nga video, ang pasyente nasuko human wala matagad sa ilang reklamo hinungdan nga nilakaw na lang nga dunay nagbitay nga dextrose ug nisulod sa nurse’s station ug didto nitumaw ang kagubot human nangatarungan ang nurse. Ang duha parehong taas og tingog sa video.

Usa kini ka kahimtang nga nibuto sa publiko bahin sa makaluluoy nga serbisyong medikal. Kumusta ang ubang provincial hospital sa lalawigan? Magpaabot pa nga dunay mobutong hitabo aron matagad? Pang-abli sa mata kini nga hitabo.

Nasayran nga si Dr. Catan sa PHO niduso sa dakong budget alang sa programa, pasilidad ug serbisyo sa panglawas sa sunod tuig. Samtang, suportado nila ni Gob. Hilario Davide III ug Bise Gob. Agnes Magpale ang modernisasyon sa mga ospital nga gidumala sa lalawigan lakip sa pagkuha og mga batid nga doktor aron dili dad--on ang mga pasyente sa dakbayan.

Hinaut nga matuman ang mga plano alang sa maayong serbisyo sa panglawas. Hinaut nga luwas kini sa korapsiyon. Maayong patas-an pa ang pasensiya sa mga kawani sa opsital sa pag-atiman sa problemado nang daan nga pasayente.