‘Intriga na sab’

Daghan pa gihapon ang na-intriga sa bag-o pa lang gihimo nga mass oath-taking sa mga bag-ong miyembro sa PDP-Laban sa Cebu.

Wala magkadimao ang mga gisulti nila ni Speaker Pantaleon Alvarez nga maoy SecGen sa PDP-Laban ug ni Koko Pimentel nga maoy presidente sa maong partido.

Matod pa ni Alvarez, mga kandidato pagka-senador sa PDP-Laban sa piniliay sa 2019 sila si Harry Roque ug Mocha Uson.

Apan lahi sab ang gisulti ni Pimentel.

Matod pa ni Pimentel, personal nga kandidato ni Alvarez sila si Roque ug Uson ug dili pa mga kandidato sa PDP-Laban. Susmariosep. Wa diay ni nila saboti og maayo?

Silang duha ni Alvarez og Pimentel pulos mga dagkong opisyal sa PDP-Laban.

Si Pimentel karaan na sa PDP samtang si Alvarez nahimong miyembro kaniadto lang piniliay sa 2016.

Tungod sa iyang posisyon nga Speaker, gihimo siya nga SecGen sa PDP-Laban samtang presidente sab si Pimentel.

Apan dunay dakong problema.

Sukad siya nahimong dakong opisyal sa partido, paspas ang pag-panghural ni Alvarez.

Bisan asa lang siya sa Pilipinas nanghural sa mga bag-ong miyembro.

Samtang pili-pili lang ang ka-Pimentel.

Ngano man? Tungod kay dunay gisunod nga lagda sa partido si Pimentel. Ug ang maong lagda mao ang pag-apil una sa usa ka basic membership seminar (BMS) og ang pag- fill up sa application for membership sa dili pa mahimong miyembro.

Kining duha ka mga lagda gisunod ni Pimentel sa tinuoray gayod.

Apan lahi si Pantaleon Alvarez.

Wala na siya magkinahanglan pa anang BMS.

Labi na gyod ang application for membership.

Diretso ang iyang pagka-miyembro sa PDP-Laban. Basta magka-sinabot lang, larga na dayon.

Mao kini ang rason nga pirmi nga mass oath-taking ang iyaha kay daghan man dayon ang iyang mabira padung sa PDP-Laban.

Kining nagkalahi nila nga pamaagi sa pagpasulod sa PDP-Laban dili ba kaha kini makaingon sa ilang panagbangi sa umaabot nga mga adlaw?

Sama sa nahitabo kanila ni Roque og Uson.

Sa akong pagtuo, magubot kining duha ka mga dagkong opisyal kon dili dayon atubangon ang maong problema.

Angayan nga ilang sabotan kon unsay ilang mga programa, unsay ilang buhaton isip pagpangandam sa umaabot nga bugnong lugaynon.

Angayan nga dili sila motipas sa naandan na nga mga pamaagi sa partido. Buot ipasabot, angay sundon ang pamaagi sa partido og dili ang pamaagi sa usa ka tawo lamang.