Sometimes I look at you

Ambot ba sab ning akong kasingkasing, uy? First time pa gani ko siyang nakita, natarantar na man ang pinitik ani. Nakatan-aw gyud ko niyag dugay dihang nakamatikod ko nga misulod siya sa gikan-an namo ni Carol. Wa ko tagda ang kauban niyang babaye, kon unsa kini sa iyang kinabuhi, girlfriend ba o unsa. “Hoy!” Sus, puwerte nakong igkinga kay kusog nga gihapak ni Carol ang akong bukton.

“Naunsa ka ba nga mora ka mag gi-magnet anang lakiha?”

Gisulingahan ko ni Carol. Nakamatikod sab diay siya sa pagsulod sa maong lalaki ug sa dugay kong pagtutok ani.

“Naa nang iyang uyab, uy! kuyog niya!”

Gisigahan na gyud ko sa akong friend sa iyang mga mata. Gingisloan ko lang siya.

“Sus baya na siya. ka-kj gyud. Igo lang gani kong mitan-aw ana.”

“Igo lang kunong mitanGiyam-iran ko ni Carol. “Nga mipilit man gyud kaayo nang imong pananaw niya. Morag di maukal nang imong tinan-awan niya, uy, Mona. Naunsa ka ba? Kadaghan nimog mga suitors?

Don’t tell me nga na- love at first ka anang lakiha?”

Wa ko tubaga si Carol. Gisundan kog tan-aw ang lalaki nga milingkod sa usa ka lamesa nga duol ra namo ni Carol human sila maka- order sa counter. Malipayon kaayo siya uban sa kuyog niyang babaye. Mikupot ang babaye sa bukton sa lalaki. Naunsa ba nga kalit man kong naglagot. Nagselos ko? Na, unsay labot ko anang lakiha nga mobati man ko sa ingon?

“Tana, uy, Caro!” Pinabundak ang akong tingog.

Wa ko na huwata ang tubag ni Carol. Mitindog ko ug nagdaling migawas sa Mang Inasal. Gikuptan ko sa bukton ni Carol nga nagdaling miagpas nako.

“Naunsa ka ba, Mona?”

Namatikdan nako nga naglagot na si Carol. Mihunong kog lakaw. Miduko ko ug sagunson kong miginhawa. Gisundan ko nig lawom nga panghupaw. Unya miatubang ko sa akong friend.

“Wa gyud ko makasabot sa akong feeling, uy, Car. Karon pa man ko mobati ani.”

“Matay, Mona, sa akong pagtuo, na- in-love gyud ka sa atong lakiha nga di nimo kaila. Di ka mahimutang, uy! Klaro kaayo sa imong mga lihok?”

Naghilom na lang ko. Unya mipadayon ko paglakaw sa sidewalk. Nakita ko si Carol nga nagpanglingo. (SUMPAYAN)