Naanod nga White Lady
Kaniadtong pagbaha sa ubang dapit sa lungsod sa Carmen sa milabay nga Semana Santa, usa si Berto nga miboluntaryo nga moapil sa rescue team. Tanod man siya sa barangay Luyang. Dinhi nabisto ang iyang pagka matuo-tuohon ug pagka hadlukan sa mga engkanto o dili
Kaadlawon sa Dominggo panahon sa ‘Sugat’ nag-estambay ang ilang grupo sa baybayon sa Luyang, dili layo sa bukana sa Cantumog River. Kadaghang maanod sa paglapaw sa tubig sa tampi sa sapa, anhi dinhi idagsa. Upat sila ka tanod sa ilang grupo. Kauban ni Berto sila si Teban, Warlito ug Nelito.
Dihang mi-banagbanag na may nakita silang nag-utaw-utaw sa mabaw nga tubig dapit sa lapyahan. Usa ka lawas sa babaye nga way sapot. Nag-utaw-utaw sa mabaw nga dapit sa dagat. Nag-amag sa kaputi ang lawas sa maong babaye, sama kaputi sa subok sa balani sa saging. Sa ilang gibarugan may gilay-on, kapin kun kulang, 40 metros ang nahimutangan sa babayem dapit sa habagatan sa ilang gibarugan.
“Manikin man tingali na. Dili tinuod nga tawo!” ni Nelito.
“Atong duolon aron masuta nato,” ni Warlito. “Tana!” uyon ni Teban. Lagsik nga nanglakaw sila Nelito, Warlito ug Teban. Nagpaulahi lang si Berto. Dihang duol na sila sa nahimutangan sa babaye miagulo kini ug mikisikisi. Mibalik sa ilang agi si Berto nga mikaratil og dagan.
“White Lady! White Lady!” nagpaninggit si Berto nga magwarawara sa kahadlok samtang nagdagan.
Hapit niya hidasmagi ang batan-ong babaye nga nagdagan sab sa daplin sa baybayon sugat kaniya.
“Dili na siya White Lady. Puti lang gyud na siya. Tabanga intawon ninyo! Si Ate Minerva na, akong maguwang! Pagka bungkag sa among balay kay naigo sa kusog nga bul-og sa tubig, siya ang nahibilin sa lawak namo kay wa kamata dayon. Kon matulog na siya di man magsul-ob og panti ug bra; mag-daster lang. Gihubo tingali niya aron makalangoy og tarong!” matod sa batan-ong babaye nga nagpakiluoy sa mga tanod.
Gihaw-as dayon nila si Minerva. Nagtawag dayon og ambulansiya si Nelito ginamit iyang selpon. Apan si Berto wa pa huwasi sa kahadlok. bisan tataw nga tawo gayud ang naanod. Lab-as pa ang mga samad sa mga bukton, mga batiis ug ubang bahin sa kalawasan niini. Giputos nila og habol samtang naghulat sa pag-abot sa ambulansiya.
“Ate! Ate! Salamat sa Diyos nga wa ka nalahos og kaanod ngadto sa lawod” sa batan-ong babaye nga nailhan na nila nga si Perla. Nagkamuritsing kini sa iyang luha, sip-on ug singot sa iyang sa iyang pagpaningkamot pag-agpas sa iyang igsuong naanod.
(KATAPUSAN)