KONTRA NI MAGSAYO MORETIRO KON PILDI

Gipadayag sa beteranong challenger ni World Boxing Organization (WBO) International featherweight champion Mark “Magnifico” Magsayo nga si Japanese Shota Hayashi ang iyang dakong pagsalig nga modaog sa ilang umaabot nga away.

“(I) was fighting since I was 16 years old, so I’ve been here longer than Magsayo. My performance on Saturday will show

everyone how much I’ve learned throughout the years,” matod ni Hayashi sa press conference kagahapon sa Tagbilaran City, Bohol nga gipadangat sa ALA Promotions sa Cebu media pinaagi sa email.

Si Hayashi, kinsa adunay 30-6-1, 18KOs nga rekord, mosuway pag-ilog sa korona ni Magsayo karong Nobiyembre 25 sa Bohol Wisdom Gymnasium sa Tagbilaran City.

Kini maoy ikatulong pagdepensa ni Magsayo (17-0, 13KO) sa iyang korona.

Ang away nila ni Magsayo ug Hayashi maoy main event sa 43rd Pinoy Pride: The Battle in Bohol boxing promotion nga gitambayayungan pagpahigayon sa ALA Promotions ug ABS-CBN.

Si Hayashi, kinsa mag-30 anyos karong Biyernes, nagkanayon nga kon mapakyas siya pag-ilog sa korona ni Magsayo, hayan hingpit na siyang moretiro. Nagkanayon ang trainer/

manager ni Hayashi nga si Hatanaka Kyoshi nga ang iyang batos nakig- sparring sa kanhi sakop sa ALA stable nga si Genesis Servania, kinsa misuway pag-ilog sa korona ni WBO world featherweight champion Oscar Valdez niadtong Septiyembre apan napakyas.

Sa promosyon, makigbatok sab og langyaw nga mga kontra ang stablemates ni Magsayo sa ALA gym nga sila si “Prince” Albert Pagara ug Jeo “Santino” Santisima.

Si Pagara (28-1-0, 19KOs) makigbatok kang Tanzanian Mohammed Kambuluta (16-3, 6KOs).

Samtang si Santisima (14-2, 12KOs) makigharong kang Indonesian Kichang Kim (8-4-1, 2KOs).