PABRIKA SA PABUTO MIULBO; 6 ANGOL
3 MGA BATA; LAING 3 HAMTONG
Tulo ka mga menor ug laing tulo ka hingkod nga mga trabahante sa factory sa pabuto ang nangapaso ug nangasamdan human nibuto ang gihimong mga pabuto sa Sitio Lawis Purok Judas Belt, Brgy. Babag, dakbayan sa Lapu-Lapu niadtong Miyerkules sa hapon.
Tungod sa hitabo, hayan makuhaan og permit sa pagpanggama ang tag-iya niini.
Giingong sa pagsungsong og pulbura sa usa ka trabahante sa bawang nga paboto, kalit kini nga nisiga ug niboto nga nikatay paingon sa nahuman na nga mga produktong pabuto.
Giila ang mga menor nga biktima nga sila si Marcia Amistad, 8, Grade 3 nga tinun-an sa Babag Elementary School; Andrew Laurel, 14; ug Isa Jane Andal, 14, mga tinun-an sa high school.
Si Marcia giingong anak nila ni Jonathan Amistad, 36, ug asawa niini nga si Argentina, 33.
Laing biktima sa hitabo mao si Angelou Casul, 18.
NAKAINGON
Base sa pakisusi sa kapulisan, nikalit og siga ang bawang nga paboto nga gisungsungan ni Jonathan og pulbura gawas sa ilang balay.
Matod pa nga nikatay ang buto-buto hinungdan nga nitakod ang siga sa nahuman nga mga paboto nga gihimo sa pamilyang Amistad.
Si Jonathan nagrabihan og paso sa nagkadaiyang parte sa kalawasan samtang ang tanang mga biktima kasamtangang nagpaalim sa tambalanan.
Sa pakighinabi sa Superbalita Cebu ni Kapitan Epifania Augusto, siya niingon nga di trabahante sa maong factory ang mga mga menor nga naangol.
Si Marcia niapas sa iyang inahan human namuhi na sa iyang tunghaan.
Samtang sila si Laurel ug Andal niagi sa dapit.
Si Augosto niingon nga nagselfieselfie pa ang duha.
Atol ning pagsuwat, nagpaabot pa sa update si Augusto sa kahimtang sa mga biktima apan kini niingon nga usa niini ang nauli na sanglit minor
burns ra ang naangkon niini. Dugang niya nga ila unya tukion ang hitabo atol ilang sesyon ug mohimo sila og ocular
inspection sa nahitabuan aron matino kon may mga pagkuwang sa tagdumala sa factory.
KUHAAN OG PERMIT
Gipaabot pa sa Regional Civil Security Unit ang report sa Lapu-lapu City Police Office sa nahitabong pagbuto sa factory.
Matod ni SPO2 Glenn Facturan, imbestigador sa RCSU7, nga kon masuta sa imbestigasyon nga dunay kalapasan ang tiggama sa pabuto, mahimong makansilar ang permit sa tag-iya niini. /