Tumulak gusto nga ‘lanes’ kilid sa underpass buksan

Si Cebu City Councilor Dave Tumulak gusto nga ang DPWH 7 ug private contractor nga nagtrabaho sa underpass project sa N. Bacalso Ave. nga motrabaho og 24 oras matag adlaw, pito ka adlaw matag semana.

Samtang mga motorista nagsagubang sa grabeng trapiko kada adlaw, si Tumulak niingon nga ang kontraktor sa proyekto nagtrabaho gikan sa alas 7 sa buntag ngadto sa alas 5 sa hapon.

Iya kining gibase sa iyang inspeksyon sulod sa gikoral nga lugar.

Si Tumulak niingon nga mas maayo pang magbukas og usa ka lane aron maagian sa mga sakyanan ug di maghuot.

Kon ang pagtrabaho sa proyekto hinay, si Tumulak niingon nga mas maayo pa nga ang usa ka lane sa dapit nga gisirhan buksan aron ang mga motorista makaagi.

Pinaagi niini maluagan ang ubang alternatibong mga rota.

“There is a portion of the project site that is vacant, which can be utilized by motorist supposedly. There is no activity there at all while the public has to bear with the heavy traffic,” sulti ni Tumulak sa mga reporter.

Matod niya nga mas maayong buksan ang duha ka outer lanes atol sa rush hour ug sirhan kini og balik paglabay niini.

Si Tumulak, kinsa nangu sa committee on public order and safety, nisugyot nga sa buntag, ang duha ka lanes sa N. Bacalso Ave., buksan sa mga motorista alang sa padung sa siyudad samtang sa hapon, buksan alang sa mga mopadung sa lalawigan kun habagatang Sugbo.

Sa pagkakaron, usa lang ka lane sa tibuok N. Bacalso Ave., labina sa eskina F. Llamas st., ang bukas.

Matod ni Engr. Josue Raoul Miole, project inspector sa DPWH 7, nga makig coordinate sila ni Tumulak sa iyang sugyot.

Si Miole nipasabot nga ang WT Construction, contractor sa proyekto, naghimo sa ilang trabaho sa tibuok adlaw.

Gawas niini, si Miole niingon nga ang kontraktor di makahimo og full time nga trabaho kay gikinahanglan pang ibalhin ang linya sa tubig sa Metropolitan Cebu Water District nga nahimutang sa dapit.