BALAUD SUNDA SA KAMPANYA BATOK DRUGAS: PALMA

“Let’s follow the law.”

Mao kini awhag ni Cebu Archbishop Jose Palma sa kapulisan human gipahibawo ni Presidente Rodrigo Duterte nga ibalik ang Philippine National Police (PNP) sa kampanya batok sa gidili nga drugas sa nasod.

Matod ni Palma, ang PNP nasayod kon unsay legal nga mga pamaagi sa pagpatuman sa balaod labi na sa pagsumpo sa suliran sa gidili nga drugas.

“We can only say, let’s follow the law, and let’s try to remember that we are one big family both the people who are obedient to the law, and even those for one reason or another, may

have broken the law. They are still our brothers, they are still

our sisters,” pahayag ni Palma sa pakighinabi sa mga tigbalita kagahapon.

Siya subli nitataw nga uyon sila sa pakigbatok sa gidili nga drugas apan dunay sakto nga mga pamaagi nga angay sundon nga legal ug moral ug pinasubay sa balaod.

Dako ang pagtuo ni Palma nga duna pay paglaum nga mausab ang mga nalambigit sa gidili nga drugas pinaagi sa drug rehabilitation program nga gipasiugdahan sa simbahang Katoliko sa Sugbo.

Apil na nini ang Surrender to God (SuGod) Drug Recovery Program nga gipasiugdahan sa Love of God Community, usa ka charismatic group nga gipangulohan ni Fe Barino, chair sa Archdiocesan Commission on the Laity.

Karong bag-o, dugang 45 ka mga drug surrenderee ang niapil sa recovery program sa ika 11 nga batch diin 6 niini mga babaye ug 39 ang mga lalake, labing daghan, 12, ang nagagikan sa Barangay Ermita, siyudad sa Sugbo.

Ang mga nitahan sa ilang kaugalingon sa SuGod motambong sa seminar workshop nga ipahigayon sa Love of God Center sa Barangay Yati, lungsod sa Liloan.

Siya nidugang kon hatagan og higayon nga ang mga nagumon sa gidiling drugas nga mag-usab mamahimo kini nga maayong mga lungsoranon sa katilingban. /