Lalis sa nurse, pasyente 'eye-opener': Dr. Catan

Ang nahitabong kaguliyang tali sa usa ka nurse ug pasyente sa Balamban Provincial Hospital sa lungsod sa Balamban gitumbok sa Provincial Health Office (PHO) nga “eye-opener” sa kakuwang sa personnel sa maong tambalanan ug sa uban pang ospital nga gidumala sa Kapitolyo.

Gikataho nga ang nurse “giatake” sa pasyente ug sa bana niini human giingong wala nihikay sa mga dokumento alang sa pagpasaka og tukmang reklamo.

Gikompirmar ni Provincial Health Officer Rene Catan nga ubos sa pribadong kapasidad sa nurse, mosangat kini og pormal nga reklamo batok sa ginang ug sa bana niini nga ni- harass kaniya sa tambalanan niadtong Nobiyembre 14.

Miabot na sa dul-an 2 million views ang video nga gi-upload sa social media, nga nagpakita sa ginang nga nikasaba og maayo sa nurse tungod sa pag-back flow sa dugo sa iyang anak diha sa dextrose.

Matod ni Catan, suportado sa Kapitolyo pinaagi sa PHO ang lakang sa nurse ug dili i- tolerate sa probinsiya ang

physical o verbal abuse ngadto sa ilang mga empleyado.

Si Catan nakigtagbo sa mga personnel sa CPH-Balamban niadtong Miyerkules ug iyang gipahinumduman ang mga nurse sa ilang tahas alang sa saktong komunikasyon ngadto sa ilang mga pasyente.

Importante kini aron mas mapasabot ug tarong ang mga pasyente labot sa medical nga kahimtang ug dili mahingawa niini.

Giangkon sa PHO nga ang nahitabong kaguliyang sa Balamban tali sa ilang nurse ug sa pasyente, nagsilbi sab karon nga eye-opener nunot sa kakuwang sa medical personnel sa mga district ug provincial hospital. Matod ni Catan, ang ideal ratio sa nurse ug pasyente naa sa “1 nurse is to 10 beds o patients.” Sa pagkakaron, wala nakab-ot ang requirement sa bisan asang tambalanan sa probinsiya.