Maoy usbon

Tunga-tunga ning tuiga, giduso ni House Speaker Pantaleon Alvarez ang House Bill 6027 nga mao ang legal nga dissolution of marriage kun pagbungkag sa kaminyuon. Sa iyang pagduaw sa Sugbo sa miaging semana, iyang gipaneguro nga kini mapalabang sa Ubos Balay Balauranan.

Ang Simbahang Katoliko naghulagway ning mao nga balaudnon nga laing termino sa divorce.

Nabalaka ang Simbahan nga daghang mga pamilya ang mangabungkag tungod sa kasayon na lang sa paghimo niini. Mahimong sayon ang pagpakasal kay kon di magkasinabot ug magmalipayon sa kaminyuon, mahimo rang mopetisyon ngadto sa korte aron pagwagtang niini.

Ang nasod duna nay balaud sa annulment sa kasal. Nganong di man lang kini maoy usbon, sama sa pagtakda og mga bayranan sa legal fees?

Nganong di na man lang itakda sa kagamhanan ang gastong uniporme bisan ngadto sa mga abogado ug psychologist? Kanang bayranan nga makaya ra sa bisan yano nga tawo.

Ang mga bayranan usa sa mga bug-at nga pas-anon ni bisan kinsa nga gusto ug kwalipikado untang makapasaka og petisyon sa pag-anular sa kasal.

Laing sagubangon sa mopasakag petisyon mao ang kakuti ug kataas sa proseso. Dangtan pa og pipila ka mga tuig una mahukman sa korte. Supakon pa kini sa estado pinaagi sa buhatan sa solicitor general.

Pamub-an unta ang gidugayon sa paghukom pinaagi sa paspas ug subsob nga mga husay.

Tungod gud ning mao nga kahimtang karon, daghan ang nanag-antos sa pagpuyo-puyo kay naglikay sa gasto ug kahasol.

Kon kini buhaton sa estado, daghan na ang makalingkawas sa kaminyuon nga maora nag impiyerno samtang padayong giila ang naandang basehanan sa pag-anular sa kasal.