Osmeña-Rama fusion?
Karong bag-o, ang grabeng nagpinahitay nga si Mayor Tomas ug si Konsehal Mary Ann delos Santos naghuyhuy naman.
Mibiya na ang tanang sakop sa Barug Team Rama ug ningtapon kini ngadto sa Partido Demokratiko Pilipino – Lakas ng Bayan (PDP-Laban). Ang nahabilin mao na lang gayud si kanhi mayor Mike Rama. Wala mokuyog pagtapon si Konsehal Jun Alcover, nga usa ka independente, nga kontra personal ni Presidente Rodrigo Duterte.
Daghang nangutana kon tinuod ba nga si Mike mobalik nalang sa Bando Osmeña – Pundok Kauswagan (BOPK). Naka-desisyon kuno ang kanhi mayor niini tungod sa iyang kahiubos nga nanumpa na sa PDP-Laban ang iyang mga sakop. Inay Barug Team Rama siya nalang usa ang nahabilin. Matawag na kini karon og Barug Mike Rama.
Daghang dili motuo niini tungod sa grabe nga away nila ni Tomas ug Mike. Apan kini tinubagay ug dinautay lang. Karong bag-o, ang grabeng nagpinahitay nga si Mayor Tomas ug si Konsehal Mary Ann delos Santos naghuyhuy naman.
Ang mga hamtung nga nagsunod sa pulitika makasulti kaninyo nga ang grabeng nagkaatbang sa pulitika dinhi sa Sugbo ang mga Osmeña ug Cuenco, nga miresulta gani sa pagkamatay sa uban nilang lideres, nagkahiusa sa gitawag nila og Osmeña – Cuenco fusion.
Kon magkauli sila si Mayor Osmeña ug kanhi mayor Rama, unsa may papel ni Mike sa BOPK? Makapalig-on ba siya sa BOPK o makapahuyang ba hinoon niini? Tanan possible sa pulitika. Sumala sa English nga panultihon “In politics there are no permanent enemies, only permanent interests.”
Ang Commision on Elections (Comelec) mi-isyu og temporary restraining order (TRO) nga nagpugong kang Daphne Lagon sa pagpuli kang Democrito “Aljun” Diamante isip mayor sa Tuburan, Cebu. Kahinumduman nga si Regional Trial Court Branch 59 Judge Hermes Montero mideklarar kang Lagon nga mananaug. Kini maoy ikatulo kun katapusang termino ni Diamante diin midaug siya og 46 botos batok kang Lagon.
Akong unsolicited advice kang Mayor Diamante nga dili nalang niya babagan kining desisyon sa korte ug iyang palingkuron si Lagon pagka-mayor. Pinaagi niini, kon wa ko masayop, makahimo na siya pagdagan pagka-mayor sulod sa tulo ka termino.
Mas makapangandam og maayo si Aljun alang sa sunod nga eleksiyon. Iya nang mapangitaan og bati nga isyu ang administrasyon unya ni Lagon alang sa ilang sunod nga panag-atbang. Apan tingalig di lang gyud buot ni Diamante nga ilhon siyang pildiro sa miaging piniliay.