Sharon-Robin loveteam gikahinaman pa
Mga pahalipay sa mga mananaug sa Kabkaban Festival 2017 sa Carcar City nga gihimo niadtong Dominggo. Mga pahalipay usab sa mga opisyales pinanguluhan ni Mayor Nicepuro Apura ug Bise Mayor Patrick Barcenas ug sa mga tagdumala sa festival.
Tinuod, sukad sa pagkamugna sa festival, nitubo kini ug nilambo.
○○○ Mga pasundayag nga wa pa makita ug di kinopya ug kadtong makapakita sa kulturang Pilipino ang makapatangdo nila ni Freddie M. Garcia ug Robin Padilla sa auditions sa Pilipinas Got Talent nga gihimo sa Cebu niadtong Lunes hangtud Miyerkules.
Tungod sa kadaghan sa mga abilidarang Cebuano, nanghinaut si Vice Ganda ug Angel Locsin nga taga Cebu na ang mosunod nga grand winner. Nagdasok ang gustong makakita sa live auditions ug mga nanimpalad.
Nagkaragkarag ang mga gustong makakita sa mga hurado ug sa mga hosts (Billy Crawford ug Toni Gonzaga). Dinhi nakaamgo na sab ko nga bulahan kami nga nakaduol ug nakahinabi ning mga tawhana nga wa paningta.
○○○ Naukay ang mga nananaw sa PGT auditions dihang gihisgutan ni Robin Padilla ang
Unexpectedly Yours nga nagpabalik sa panagpares nila ni Robin Padilla ug Sharon Cuneta. May kagahapon ang duha mao nga nakilig ang ilang mga fans.
Isalida kini sa Miyerkules, Nob. 29. Kauban nila dinhi ang nagkainit nga panagpares nila ni Julia Barretto ug Joshua Garcia. Si Cathy Garcia-Molina ang direktor ug ubos kini sa Star Cinema.
○○○ Ang Sugbuanong Musikero Inc. pinangulohan ni Gitoy Ornopia Jr. mopasiugda sa Pasiawit: Paskohanong Dalit sa Dis. 2 sa City Wing sa SM Seaside City Cebu sugod sa alas 4 s.h. hangtud alas 7 s.g.
Ang mopasundayag: Vina Morales, Chad Borja ug anak niining babaye, Max Surban, Crazy Duo, Dos Compañeros, Rommel Tuico, Nash Casa ug Polpol, Fr. Jonas Mijares, Cebu Clergy Performing Artists ug uban pa.
Libre kini. Manan-aw ta.