K.O. TUYO SA HAPON
Tagbilaran City, Bohol - Aron paglikay sa hometown decision, ang pag- knockout ni undeafeated ug WBO International Featherweight champion Mark “Magnifico” Magsayo maoy anaa karon sa alimpatakan sa Haponanong challenger nga si Shota Hayashi.
Sa final press conference kagahapon nga gipahigayon sa Bohol Tropics and Resorts, ang beteranongi Hayashi (30-6-1, 18 KOs), pinaagi sa interpreter, mitug-an nga alang kaniya dakong oportunidad kining maong away nga angayan lang dili usikan kay mao usab kini ang dalan nga magiya kaniya aron makab-ot ang iyang tinguha nga makaaway og world title.
Ang manager ni Hayashi nga Kiyoshi Hatanaka mipadayag usab nga mianhi sila sa nasod alang sa usa ka misyon nga mao ang pagdaog. Ug sama ni Hayashi, knockout usab ang nisantop sa iyang hunahuna.
Nasayran, nga kini maoy unang higayon nga si Hayashi, kanhi Japan Champion, nakaaway gawas sa ilang nasod.
Apan, matod ni Hayashi nga wa kini niya igbali ug gani iyang gikalipay ang maong tanyag ug labaw pa usab niyang gikahingawa nga makaaway og dunay saktong kusog nga sama kang Magsayo.
“I saw some of his previous fights, and he’s a strong puncher, and I want to fight him,” matod ni Hayashi, kinsa subling mipadungog nga andam siyang moretiro kon mapildi siya ning awaya.
Si Hayashi naila sa iyang pagka fighter ug gihulagway nga ligon ug aduna usay kaisog.
Apan si Maagsayo (17-0, 13 KOs), daw sa wa motubay sa panganti ni Hayashi.
Sa pangutana kon tinguha ba usab niya ang pag- knockout, ang lumad nga taga Tagbilaran igo rang mipasumbingay pinaagi sa pag-ingon, “di ta maghunahuna og knockout. Atong pangitaan unsaon nato pag- knockout. Ang among gipreparasyonan nga moabot og 12 rounds. Pero og maigo sa patyanan human dayon.”
Hinuon gipadayag ni Magsayo ang iyang dakong respeto ni Hayashi. “Beterano na siya, unya former champion pa gyud na sa ilaha. Di na madali-dali. Basta makalingaw gyud ning awaya,” dugang sa kanhi Sorbetero.
Si Prince Albert Pagara (271, 18KOs) mipabuhagay usab sa iyang kaandam batok sa Tanzanian nga si Mohammed “Chico” Kambaluta (17-3, 6KOs).
Taas man tuod siya og kasinatian base sa ilang tagsatagsa ka mga record, apan way luna sa kompiyansa si Pagara.
Alang ni Pagara, impresibong kadaugan ang gusto niyang ipakita ning awaya sanglit tinguha niya nga makabawos ni Cesar Juarez, kinsa maoy bugtong nakamantsa sa iyang record sa dihang gi knockout siya sa ikawalo nga round sa ilang away sa niaging tuig sa San Mateo, California.
Masaligon usab ang bag-ong boxing sensation nga si Jeo Santisima (14-2, 13KOs) sa iyang pagpakigsangka batok sa Indonesian fighter nga si Kichang Kim (8-4-1, 2KOs). Karong udto, ipahigayon ang tinimbangay sa Island Center Mall.