USJ-R daog na sab sa Flashback

Nagpabiling limpyo ug wa pay pildi ang University of San Jose Recoletos (USJ-R) Jaguars sa nagpadayon nga Flashback CAAA Basketball Alumni Association human nila ilubong ang USP-F Panthers 46-Up category, 11487, niadtong Sabado sa Inayawan Sports Complex.

Si Frankie Lastimoso maoy nangulo sa Jaguars ni playing coach Pablo Yu pinaagi sa iyang 31 puntos, samtang midugang sila si Leodie Garcia og 26 ug Rey Gurrea og 22 puntos.

Sa kadaugan, nakasiguro na og luna alang sa sunod round ang Jaguars, nga nakakuha usab og 18 puntos gikan ni Edward Buhay ug 10 puntos ni Rey Abarquez.

Nakatampo usab sila si Freddie de Campo 8, Jingjing Rama 6 ug Edito Salacut nga may 3 puntos.

Sa 45-under division, gilubong usab sa University of Cebu ang sister-team Cebu Technical School, 121-93.

Si Alex Cainglet mipabaha og 37 puntos, midugang og 23 si Balt Jueves, 22 puntos usab gikan kang Robert Abasolo aron pangulohan ang UC nga may 3-1 nga baraha.

Samtang sa duwa niadtong Dominggo nga gipahigayon sa Aznar Coliseum, kulbahinam nga kadaugan ang naangkon sa UV Lancers human kini mipatapsing sa CIT Wildcats, 117114, sa 46-Up division.

Gipildi usab sa CCC/UC ang SWU Cobras, 85-73.

Sa 45-below category, gilupig usab sa USJR Jaguars ang USC Warriors, 64-56, ug gipatapsingan sa SWU Cobras ang SIT Skyblazers, 80-76.