PNP ALERTO PAGKANSELAR SA PEACE TALK

Alerto ang armadong kusug sa nasod human pirmahi na ni Presidente Rodrigo Duterte ang Executive Order No. 360 nga nag- terminate na sa peace talk tali sa gobiyerno ug sa mga rebeldeng komunista. Si Col. Medel Aguilar, information officer sa Armed Forces of the Philippines (AFP) Central Command, nagkanayon nga wa sila mokompyansa ilabi na sa giluwatang pamahayag sa founder sa Communist Party of the Philippines (CPP) nga si Jose Maria Sison nga dunay mahitabong halapad nga pagpangatake sa mga rebelde.

Matod ni Aguilar, ang kasundalohan andam kon unsa ang buhaton sa mga sakop sa New Peoples Army (NPA).

Gipakagamay lang hinuon sa Centcom ang sunodsunod nga gihimong pagpamanhig sa mga rebelde sa ubang bahin sa nasod ug ning bag-o lang sa probinsya sa Iloilo nga mikalas og pulis ug niangol og laing napulo ka mga kauban niini.

“Sa ngayon our troops remain to be on alert kasi nakikita naman natin yung mga ginagawa nila may mga ambush, kung titingnan mo hindi naman malakihan considering the strength of the NPA which is now small as compared to previous years nung mga panahon ng 1980’s,” matod ni Aguilar.

Gipasanginlan sa militar ang mga rebelde nga nihimo og pagpangilkil ug dili na sama kaniadto nga dunay gibarugan nga idolohiya.

Ang chairman sa Bagong Alyangsang Makabayan (Bayan) Central Visayas Jaime Paglinawan nasagmuyo sa pagputol sa sabotsabot sa kalinaw.

Matod niya nga naa na unta sa maayong direksyon ang mga tinguha nga maresulbar ang mga isyu labot sa problema sa mga mamumuo ug ang Comprehensive Agreement on Social and Economic Reforms (CASER).

Ilang gipasanginlan si Duterte nga maoy nag-sabotahi sa peace process.

Nabalaka usab sila nga ning pagdeklara og all out war sa gobiyerno batok sa mga NPA ug paglakip sa mga progresibong grupo nga giingong kaalyado sa mga rebelde.

Karong Nobiyembre 30, atol sa ika-104 nga adlawng natawhan ni Andres Bonifacio, ang Bayan mohimo og lihok-protesta.