REWARD DI PA IHATAG

TEAM RAMA DUNAY ‘3 KA KONDISYON’

Dili pa madawat sa tipster o bisan kinsa ang P300,000 reward sa pagkasikop sa giingong maoy nibanhigni Kapitan Felicisimo “Imok” Rupinta sa Barangay Ermita.

Si Bise Mayor Edgardo Labella nagkanayon nga lingkuran pa sa ilang grupo kinsa maoy nag-amot-amot kon angay na bang ihatag ang maong kantidad uban sa paghuwat sa taho gikan sa kapulisan.

Buot sa grupo ni Labella nga matino ang tulo ka kondisyon sa hingpit nga kasulbaran sa kaso, diin natuman na ang usa niini nga mao ang pagkasikop ni Jimmy Largo ug ang laing duha mao nga kinahanglan na masikop ang giingong triggerman subay sa gisulti ni Largo ug ang pag-ila sa utok o nagsugo sa pagpusil sa kapitan.

Ang bise mayor nidayeg sa pulis gumikan sa ilang pagsikop kang Jimmy Largo apan gipadayag sa kanhi Ombudsman director nga kinahanglan nga paladman pa sa kapulisan ang ilang imbestigasyon ug dili matagbaw sa pangangkon ni Largo.

“Kanang niangkon (Largo) ila gyud nang i- evaluate kon dili bana fall guy lang kay daghan kaayong hitabo nga fall guy was indicted just to hide the real criminals. The police should look into that they should be smarter than the criminals,” matod ni Labella.

Giklaro sa bise mayor nga andam na ang kwarta apan mahatag lang kini kon mahibaw-an sa kapulisan ug matumbok si kinsa ang kauban ni Largo sanglit ang subay sa common law wife ni Rupinta duha ang nagsakay sa motor nga maoy nagbanhig kanila sa Liloan niadtong gabii sa Nobiyembre 23.

Ikatulo mao nga mailhan sa kapulisan ug matumbok ni Largo kon siya ang tiunay nga killer ang nagpaluyo sa pag- ambush patay kang Rupinta sanglit ang bise mayor dili motuo nga walay mastermind sa krimen.

Si Largo, usa sa mga tawo ni Rupinta sa Ermita, kinsa niangkon atol sa interbyu sa dyRC nga kaniadto suguon siya sa kapitan sa pagpatay sa mga badlungon didto sa barangay ug nibutyag sa samang pakighinabi sa radyo nga adunay kanhi konsehal sa barangay ang nitawag kaniya aron patyon si Imok sa wala pa matino nga rason. /