Prosisyon sa pista sa Senyor

Gipahibawo nang daan sa kadagkuan sa Basilica Minore del Santo ang rota nga subayon atol sa foot procession sa besperas sa kapistahan sa Señor Sto. Niño sa sunod tuig.

Si Padre Ric Anthony Reyes, kalihim sa 2018 Fiesta Señor Executive Committee, nibutyag nga sa 2018 gamiton og balik ang rota nga gigamit karong tuiga.

Matod niya, nagplano sila nga subayon ang rota nga moagi sa dan V. Rama sa solemn

procession sa bisperas sa kapistahan, Enero 20, 2018 kun ang ikaduhang rota.

Apan gitambagan sila sa kagamhanan sa siyudad sa Sugbo pinaagi sa buhatan ni Konsehal Dave Tumulak nga dili mosubay sa maong rota gumikan sa kahimtang sa dagan

sa trapiko sa N. Bacalso labi na sa nagpadayon nga konstruksyon sa underpass sa Barangay Mambaling. “It will worsen the traffic situation, much more it is a fiesta.

So, mas maayo nga i- consider namo ang traffic situation tungod sa construction,” pasabot ni Reyes.

Ang proyekto nga gisugdan niadtong Agusto ning tuiga gipaabot mahuman sud sa 18 ka buwan kon way kakulian.

Sa giaprobahan nga rota sa 2018 Fiesta Señor Executive Committee, ang prosesyon manukad sa Basilica sa Osmeña Blvd. hangtod sa Fuente Rotunda dayon liko sa tuo sa Gen. Maxilom Ave., liko sa tuo sa Imus Ave., liko sa wala sa M.J. Cuenco Ave., dayon liko sa tuo sa Osmeña Blvd., dayon pabalik sa basilica.

Samtang way kausaban sa Traslacion kun pagbalhin sa mga imahen sa Sto. Niño ug Birhen sa Guadalupe sa Enero 19, Biyernes, sugdan human sa alas 5:30 sa buntag nga misa diin dad-on kini gikan sa

basilica paingon sa National Shrine of St. Joseph sa siyudad sa Mandaue.

Ang motorkada mosubay sa dan D. Jakosalem, Gen. Maxilom Ave., Archbishop Reyes Ave.,/Gov. M. Cuenco Ave., dayon A.S. Fortuna Ave., liko sa wala sa dan A. Del Rosario, liko sa tuo sa dan S.B. Cabahug., dayon sa National Shrine of St. Joseph.

Sa fluvial procession, alas 2 sa kaadlawon ang send-off

mass sa national shrine sa dili pa dad-on ang duha ka mga imahen sa Nuestra Señora de Regla National Shrine sa siyudad sa Lapu-Lapu.

Gikan sa national shrine, ang motorkada mosubay sa dan P. J. Burgos, liko sa wala sa Ouano Ave.,/dan Jose L. Briones., liko sa tuo sa A. C. Cortes Ave., sa unang Mandaue-Mactan Bridge, liko sa tuo sa Quezon Highway/dan G.Y. Dela Serna, liko sa tuo sa dan S. Osmeña dayon sa Virgen de Regla National Shrine.

Sa foot procession gikan sa Virgen de Regla Shrine diin dad-on ang mga imahen sa Muelle Osmeña alang sa fluvial procession sa Mactan Channel, matod ni Reyes, nagpadayon pa ang sabotsabot bahin sa mga sugyot nga rota sa prosisyon.

Ang kausaban sa rota gihimo human sa nagkadaghan nga deboto nga mokuyog sa prosisyon sa imahen.