Sabotsabot sa walhon

Walay magmadaugon sa gubat subay sa kasinatian sa kasaysayan. Sa bag-ong panahon, ang sabotsabot o dayalogo maoy gitamod nga pamaagi sa paghilot sa kasungian aron paglikay sa pag-agas sa dugo ug pagkakalas sa enosenteng kinabuhi. Ang walhong rebelyon sa Pilipinas giila nga labing dugay nga rebelyon sa Asya nga kapin na sa upat ka mga dekada sukad niadtong 1968 sa pagkamugna sa Communist Party of the Philippines (CPP) uban sa pagkatukod sa ilang armadong sanga, ang New People's Army (NPA).

Ang CPP-NPA uban sa National Democratric Front of the Philippines nakigbisog sa paglumpag sa kagamhanan aron pagtukod sa bag-ong estado nga gipangulohan sa working class o mamumuo ug ang pagwagtang sa impluwensiya sa Estados Unidos sa Pilipinas.

Daghan nang kinabuhi ang nakalas tungod sa panag-unay sa mga Filipino tungod sa gibarogan nga prinsipyo ug pagtuo. Mao kini hinungdan nga namugna ang sabotsabot sa kalinaw sa nagkalainlaing kanhi administrasyon sa nasod apan makadaghan na usab kini napakyas lakip sa kasamtangang liderato ni Presidente Rodrigo Duterte.

Ning bag-o, ang progresibong si Duterte nikanselar sa pakigsabotsabot sa walhong grupo human niakusar sa naulhi nga dili sensiro sa pakigsabot. Nasuko siya nga nahitabo ang pangataki sa posisyon sa militar samtang nagpadayon ang sabotsabota sa kalinaw.

Apan, si Senate Aquilino Pimentel III nasayod sa kaimportante sa dayalogo busa nitanyag sa ‘unof�icial’ nga sabotsabot samtang nipadayag sa posisyon sa presidente nga nakabsan og pailub. Makapangutana kita, kontrolado ba kaha sa liderato sa CPP-NPA-NDFP nga tua sa gawas sa nasod ang ilang ubos nga ang-ang? o Wala ba kaha 'masudli' ang ilang han-ay aron pagsabotahe o paglawgaw sa sabotsabot?