Nangabot na ang mga bisita sa Sugbo
Akong gikauban og paniudto ang mga paisano nato nga gikan sa Estados Unidos. Pinasikad ni sa imbitasyon sa usa ka suod nga higala nga taudtaud na sab nga nanarbaho didto. Samtang nangaon mi naminaw ko sa ilang mga sugilanon. Sa kataas sa oras nga among gisaw-an atubangan sa talad kan-anan pulos mga pagdayeg sa pinangga natong Sugbo ang akong nabati.
Dul-an sa semana na sukad nga sila naabot. Daghan na sila ug nasuroy nga mga dapit sa dakbayan sa Sugbo. Nag-una sa ilang gidayeg ug maayo ang daw mga uhong nga mall nga nanurok dinhi sa ato.
Matod nila pagka dako na sa kasauban ang ilang nasudong sukad sa ilang pagbiya. Sa kadaghan sa mga kausabant nga ilang gihisgutan ang labaw nako nga gikahimuot ang pag-ingon nila nga taliwala sa mga kausaban, ang wa gyud mausab mao ang pagka maabi-abihon gihapon sa mga Sugboanon.
Ang init nga pagdawat sa ilang mga paryente sa ilang pag-abot. Ang mapahiyomon nga staff sa airport lahos na ngadto sa staff sa hotel nga giistaran ug sa mga silbedora sa mga kan-anan nga ilang gisudlan. Duna sa'y nihisgut sa mga taxi driver nga gihulagway nila nga komedyanti apan masaligan.
Mga positibong komento nga makapahupay sa mga negatibong obserbasyon nga sagad natong madunggan kung taxi na'y hisgutan. Pero ang trapik di gyud makalihay sa ilang pagpaniid. Uban sa pangutana kung nganong kulang pa sa inprastraktura.
Bitaw kung maghisgut man gud ta ug trapik lisod ipasigarbo nga ang atong dakbayan dakbayan nag-una sa mga dagkong kausaban alang sa kabulahanan sa mga motorista ug sumasakay. Ang inprastraktura nga gipasabot mao ang mga kahimanan nga gigamit sa mga advanced nga kanasuran nga wala sa ato. Engineering mao ni ang hubad kung maghisgut kita ug trapiko.
Dako pa ta og apason paghingpit sa dakong panginahanglan unsaon nga di magkutoy ang atong tiyan pagpinaabot kanus-a mahaw-as gikan sa pagka tanggong sa karsada ilabi na sa rush hour nga maoy kuntra natong tanan. Basin sa sunod nilang pagbisita sa Sugbo makabati na ta ug positibong komento labot ning maong problema.
PASIDAAN
Ginagmay nga tips alang sa mga bisita ning panahon nga nagkaduol na ang pasko. Ang pagplano sa inyong biyahe importante kaayo. Ang mga dapit nga adtoan kinahanglan nga suhetohon daan sa di pa molarga.Ang mga dapit nga adtuon kinahanglan nga masayran nang daan kung unsaon pag-adto, unsa'y sakyan ug pila ang plitihan. Ang mga contact numbers importante kaayo. Mas maayong mapahibalong daan ang mga tawo nga gustong adtoon. Ang mga numero sa police station i-phonebook ug siguro aron nga sa oras sa panginahanglan dali rang matawgan. Gani ang mga police station mas nindot unta nga may help desk nga kadangpan sa mga bisita dili taga ato.
Ayaw kalimot ang mga kiriwan ug kamot naa ra sa palibot. Kung asa man ni sila nag-imbodo mas maayo puhagon nang daan sa kapulisan kay sa magpaabot ta nga dunay mabiktima. Di kalikayan nga mangabot ang mga dayo nga badlingon sa pagtoo nga duna sila'y daghang mabiktima dinhi sa ato.