OKC KAGING SA DALLAS

Human sa ilang makabungog nga kadaugan batok sa defending champion Golden State Warriors, tulo ka adlaw ang nakalabay, sunodsunod nga kapildihan maoy naangkon sa Oklahoma City Thunder sa dihang gipakaging kini sa Dallas Mavericks, 97-81, kagahapon sa NBA.

Si Dirk Nowitzki mipakatap og 19 puntos nga maoy iyang

career-high sa nagpadayon nga season samtang miabag usab kaniya ang rookie nga si Dennis Smith sa kadaugan nga nagduot sa Oklahoma City og laing kapildihan.

Sa niaging adlaw, ang Thunder gilubong og 15 puntos sa Detroit Pistons apan nakagukod kini sa second

half. Apan wa mapahimusli niini ang ilang kahago human napildi sila sa Detroit og usa ka puntos.

Ang duha ka sunodsunod nga kapildihan nahitabo human nila gilubong si Kevin Durant ug ang Golden State nga misulong didto sa ilang korte.

Si Smith mitali og 15 puntos ug upat ka assists.

Nangulo sa Thunder si Russel Westbrook nga may 28 puntos, 12 ka rebounds ug siyam ka assists. Midugang si Carmelo Anthony og 16 puntos samtang si Paul George igo rang naka dos puntos apan mipakatap og 10 ka assists.

Kon unsa ang nasinati sa Thunder, sukwahi usab ang gipakita sa Boston.

Human maputol ang ilang 16 ka sunodsunod nga daog sa dihang gipildi sila sa Miami Heat, ang Celtics mibalik sa korte ug sa ikaduhang higayon misugod na usab sa pagpangutlo og kadaugan.

Si Kyrie Irving mipaksit og 25 puntos, midugang si Al Horford og 21 alang sa Boston aron ilang pukanon ang Indiana Pacers, 108-98.

Ang Boston (18-3) milupig sa Indiana 37-16 sa third

quarter aron pagpabukad sa ilang labaw gikan sa nuebe puntos ngadto na sa 82-170 nga bintaha. Nangulo sa Pacers (11-9) si Myles Turner nga may 19 puntos.

Wa makaduwa si Jaylen Brown sa Celtics tungod kay mihatod kini sa lubong sa iyang amigo. Si Marcus Smart nga mitapos sa duwa nga may 15 puntos ang gipalingkod ug wa na pabalaka tungod sa iyang gipamati sa wala nga tuhod.

Ang Golden State Warriors kagahapon yano ra usab nga mipukan sa New Orleans Pelicans, 110-95.

Si Steph Curry bugnaw kaayong nakasugod sa duwa diin wa siyan napasulod sa unang napulo niya ka itsa, apan nanginit kini sa third

quarter diin mipabuto kini og 14 sa iyang 27 puntos, samtang midugang usab og 24 si Klay Thompson.

Sa laing duwa, mipabaha og 37 puntos si James Harden kinsa mipakatap og 10 ka assists ug ang Houston Rockets mi-rally human mabiyai og 22 puntos aron pukanon ang New York Knicks, 117-102.

Ang 18 ka triples ug ingon man ang 44- puntos nga nahimo sa ilang mga second stringers nga gipangulohan ni Ryan Anderson maoy nagsilbing yawe sa ilang kadaugan.

Gipadagan sa Los Angeles Clippers ang Sacramento Kings, 97-95, gipakuratsa sa Utah Jazz ang Milwaukee Bucks, 121-108. Gilampornas sai Toronto Raptors ang Atlanta Hawks, 112-78, gibuntog sa Portland ang Washington Wizards, 108-105.

Gibaraw usab sa Philadelphia Sixers ang Magic sa Orlando, 130-111, ug kaluoy nga gipaluhod sa San Antonio Spurs ang Hornets, 10686. / JBM