MAGSAYO DI PA IHAGAD

Human sa makutas nga kadaugan sa iyang pagdepensa sa World Boxing Organization ((WBO) Featherweight International title niadtong Sabado sa gabii, ang kampo ni undefeated Mark “Magnifico” Magsayo misalikway una sa ilang tinguha nga paawayon kini alang sa world title fight.

Sa interview human sa away nga gisaksihan sa gibanabanang dul-an sa 5,000 ka mga dumadapig, si Michael Aldeguer, ang chief executive

officer ug presidente sa ALA Boxing Promotion, mitug-an nga daghan pang angay nga kat-unon ang 22-anyos nga

undefeated fighter sa dili pa kini mosagubang alang sa regular world title fight.

“We’re not rushing him. He’s just 22 years old. He has the talent but he has to develop his

maturity,” padayag ni Aldeguer sa interview human sa away nga maoy ikatulong depensa ni Magsayo sa titulo nga iyang naangkon niadtong tuig 2015.

Si Magsayo milampos sa pagdepensa sa korona pinaagi sa unanimous decision nga kadaugan batok sa beterano ug lig-ong challenger nga si Shota Hayashi sa main event fight sa Pinoy Pride 43: The Battle in Bohol nga gipahigayon sa Bohol Wisdom gym sa Tagbilaran City.

Tulo ka judges nga sila si Edgar Olalo, Tony Pison ug Edward Ligas ang pulos mitali og 116-112 sa ilang scorecard pabor ni Magsayo.

Gilupig man tuod sa garbo sa Tagbilaran sa palutsanay sa kumo si Hayashi, apan ang kalig-on sa hapon ilabi na sa mga uwahing round sa away maoy naghatag dakong hudlat ni Magsayo.

Mga solidong kumo ang gipangbuhian ni Magsayo nga miigo sa nawong ug lawas ni Hayashi apan wa kini makapaatras sa Haponanong challenger.

Sa ikawalo ka round, nisagunto si Hayashi sa dihang usa ka solidong kumo ang miantimano sa iyang tiyan.

Apan bisan pa sa mga nadawat niyang kastigo, wa mobahar ang kaisog sa kanhi Japan champion.

“Grabi gyud ka kagahi. Wa lang gyud nako ihurot akong kusug kay kon di nako siya matumba, dilikado ug akoy matumba,” saysay ni Magsayo human sa away.

Sa ikasiyam ka round, daw sa gikutasan na og maayo si Magsayo nga nakapabalaka sa iyang dumadapig nga ning higayona nagpalanog sa ilang abiba.

Apan gilahutay ni Magsayo ang nahabiling mga round aron irehistro ang ika 18 nga kadaugan.

Hinuon si Aldeguer mipasabot nga kon tanyagan o mamahimong mandatory challenger si Magsayo alang sa

world title fight, dili usab nila palabyon ang panahon.

Ang tugob sa aksiyon nga kombati ni Magsayo ug Hayashi maoy nakahulip sa away nila ni Prince Albert Pagara ug Jeo Santisima nga sayo kaayong mipaundang sa ilang mga langyawng kontra.

Si Santisima nagkinahanglan lang og 36 segundos sa first

round aron idespatsar ang Indonesian nga sa Kichang Kim samtang gipaundang usab ni Pagara ang Tanzanian nga si Mohammed Kambuluta sa second round.

Sa ubang mga away, gipaundang ni Roli Gasca si Jason Tinampay 1:15 sa 1st round samtang yanong gipildi sa beteranong Rocky Fuentes si Ryan Tampus pinaagi sa unanimous decision.

Midaog si Melvin Jerusalem pinaagi sa unanimous decision batok ni Jestoni Racoma. Virgel Vitor mipildi ni Johnrey Logatiman sa unanimous decision. / JBM