GRUPO SA KRIMINAL NANULIS
PRO 7, TALAMBAN POLICE NANGITA SA 3 KA TAWO NGA MIDAGIT SA 60-ANYOS
Talamban Police Station ug Police Regional Office 7 nagtinabangay na sa imbestigasyon sa pagtulis sa usa ka 60 anyos nga ginang sud mismo sa iyang pribadong sakyanan gikan nga nag withdraw og kwarta sa banko sulod sa usa ka mall niadtong Lunes sa buntag.
Gipangita sa kapulisan nga gipangulohan sa Talamban police inabagan sa Regional Special Operations Group 7 ang tulo ka mga tawo, duha niini mga armado, nga maoy ningtulis sa 60 anyos nga ginang nga si Elizabeth Seniedo, taga Sunny Hills, Barangay Talamban.
Base sa pasiunang imbestigasyon, nagtuo ang kapulisan nga ang mga nanulis sakop sa organisadong grupo sa mga kriminal.
Matod ni Sr. Insp. Arieza Otida, hepe sa Talamban police station, si Seniedo gikan nag withdraw ug kwarta sa usa ka bangko nga nahimutang sa usa ka dakong mall sa maong lugar apan sa iyang pagbalik sa iyang sakyanan nga giparking sa basement kalit lang siya nga giduol sa duha ka armadong lalake ug gitionan ug mimando nga mosulod sa iyang sakyanan.
GIDAGIT
Sa sulod sa iyang Toyota Fortuner (AED 3357) color
brown, gisampungan og panapton ang iyang duha ka mga mata ug gidala sa habagatang bahin sa probinsya sa Sugbo.
Gikuha ang iyang relo nga mobalor og P300,000; kwarta nga P15,000 ug mga butang niini sama sa cellphone.
Human makuha ang maong mga butang, gipakanaog siya sa mingaw nga dapit sa Barangay Kanyuko, lungsod sa Dumanjug, Sugbo ug gihikot sa punoan sa kahoy ang iyang mga kamot.
Human siya magapos, nanibat ang mga tulisan sakay sa iyang sakyanan.
Pipila ka gutlo ang nakalabay, nakabadbad si Seniedo sa higot ug nisakay siya og bus paingon sa lungsod sa Moalboal. Didto na siya nidangop sa
police station sa lungsod ubos sa paggiya sa konduktor aron itug-an ang nahitabo kaniya.
“Until such time nga nihunong na sila in a certain
place, gibaatan siya sa scarf niya then gihigot siya sa usa ka kahoy then after which gidala ang iyang mga gamit ang iyang bag cellphone Rolex nga relo worth P300 thousand
and ang Fortuner niya nga sakyanan,” matod ni Otida.
ORGANISADO
Gituohan sa kapulisan nga organisadong grupo ang naghimo sa krimen, matod ni Otida kon basehan ang pamahayag ni Seniedo.
Gitug-an sa 60 anyos sa mga imbestigador nga samtang nagdagan ang sakyanan, dunay gikasulti ang usa ka lalake sa telepono nga dili Cebuano ang sinultihan.
Iyang gituohan nga sinultihan sa taga Mindanao ug giingong dunay naghatag og idiya kung asa moagi nga dili madakpan sa mga police.
“According to her murag naa kunoy nag monitor nila kay usahay mo mention man kuno ang suspect about sa kanang naa bay nag checkpoint, naa bay operations para mo guide asa moagi, maorag organized jud ni sila,” matod ni Otida.
Usa sa mga tulisan nangayog pasaylo kaniya kay tulis ra ang ilang tuyo kay nagkinahanglan siyag kwarta tungod kay manganakay ang iyang asawa.
Sa sinugdan giingong duha ra ka mga tawo ang nanulis kaniya, apan dunay babaye nga misakay sa dapit nga wa niya mahibaw-i kon diin.
Giingon nga sa tibuok biyahe gitaptapan ang iyang mga mata sa mga tulisan hinungdan nga wa siya masayod diin sila niagi.
Niadtong Martes sa kaadlawon na siya nakalingkawas gikan sa gidad-an kaniya.
Wa pa masayri sa kapulisan nganong way nakabantay nga guwardya sa mall labina sa entrance sa parking area. Nahatagan na og kopya sa
close circuit television (CCTV) camera ang Talamban police nga maoy ilang gisubay aron mailhan kon kinsa ang maong mga tulisan alang na unya sa himuon nila nga pag gukod niini.
Sa pagsuwat ning mao nga taho, wa pay feedback sila si Otida kon unsay kuha sa CCTV.
Nakig-alayon na usab sila sa Highway Patrol Group-7 aron maalarma ang sakyanan nga hangtod karon naa pa sa mga kamot sa mga tulisan.
MAGBANTAY
Human sa insidente nga aduna’y iladong negosyante ang gidagit sa usa sa mga mall sa Barangay Talamban, dakbayan sa Sugbo, nipahimangno si Konsehal Dave Tumulak, kinsa deputy mayor
for police matters, nga magmatngon dili lang ang mga negosyante apan lakip na ang mga yanong tawo.
Matod sa konsehal nga kinahanglan nga magmabinantayon sa palibot hilabi na kon mosakay na og sakyanan, mas maayong ma- lock dayon ni.
Giawhag ni Tumulak ang publiko nga kon mabantayan ang sakyanan ni Seniedo i- report dayon sa labing duol nga police station. Ang konsehal nagtuo nga local
boys ra maoy naghimo sa maong krimen.