‘ABUHAN’ NANIRA; CITY HALL NAUNHAN
Wa pa makaluwat og closure
order si Cebu City Mayor Tomas Osmeña nga pasirhan ang Abuhan Filipino Cuisine o mas naila nga Abuhan Pochero, sira na kini tungod kay plano na nila nga mamalhin og laing dapit.
Sa closure order sa mayor, nisaysay kini nga way Mayor’s Business Permit gikan 2013 hangtod 2017 ang maong kan-anan nga nakalapas sa Omnibus Tax Ordinance sa Cebu City.
Kagahapon, gibutyag usab ni Acting Cebu City Treasurer Tessie Camarillo nga niadtong Oktubre 2 pa nila gipadalhan og notice to comply ang kananan.
Oktubre 11, dihang niluwat usab sila og final demand letter ug didto usab nila giisyuhan kini og letter of authority to examine sa ilang books of accounts.
Base sa ilang assessment sa tax ug regulatory fees, sukad 2014, niabot sa P979,466.50 ang utang niini nga buhis sa Siyudad.
Nobiyembre 20, nibayad kini og P422,877.50 samtang ang kuwang nga kapin P500,000 nasabutan pinaagi sa compromise agreement nga bayran kini nila sulod sa unom ka buwan.
“Mo- close naman na diha sila sa Ramos kay (mobalhin) adto’s Mango. We advised them to register the new corporation that would handle Abuhan - Pochero,” matod ni Camarillo.
Ang Agus Resort Development Corp. ang nagdala sa Abuhan.
Samtang ang Learning Association de Abuhan Inc., di mamahimong mao’y modala niini tungod kay usa kini ka nonstock/ non-profit nga sukwahi sa nature of business nga restaurant.
Gisuwayan ning mantalaan pagkuha sa habig sa maong kan-anan apan sa pagbisita sa maong dapit sirado na kini sugod niadtong Nobiyembre 28 ug wa’y representante nga niatubang atol sa pagbisita.
Ang Abuhan di maoy unang mga establisemento nga gipasirhan ni Osmeña.
Ang mga outlet sa Rico’s Lechon gipasirhan sa mayor pipila ka mga buwan ang nakalabay tungod usab sa kakuwang sa business permit. /