2 tawo mitahan sa ilang mga armas sa Talisay PNP
Duha na ka mga tawo ang bulontaryong mitugyan sa ilang mga armas nga way lisensiya human nga ang kapulisan sa Talisay nihimog Oplan Katok.
Ang Oplan Katok usa ka programa sa kapulisan sa nasud diin kadtong mga tawo nga naghupot og armas nga wala ma-renew ang lisensya ilang tuktukon ug pahibaw-on nga anaa sila sa listahan sa kapulisan nga naghupot og armas nga wala ma-renew ug kinahanglan na kining i-renew tungod kay kon di, mahimo na silang madakop pinaagi sa search warrant tungod sa paghupot og illegal nga armas.
Si Supt. Jason Villamater hepe sa Talisay Police Station miingon nga mahimong wa ma-renew ang lisensya sa armas, mahimo usab nga nabaligya na, gikawat o ba kaha nibalhin na sa pagpuyo.
Giawhag ni Villamater kadtong mga tawo nga mahimo usab nga i-deposito lang una ang ilang armas ngadto sa ilang buhatan hangtod nga dili ma-renew ang lisensya aron di kini nila dakpon sa umaabot nga adlaw.
Kagahapon, personal nga gitunol sa kanhi gwardya ang iyang armas ngadto sa pangu sa kapulisan sa Syudad sa Talisay
Si alyas Cañor, 32, taga Barangay Lawaan sa nahisgutang syudad nibutyag nga gitoktok siya sa mga pulis ug giawhag nga itahan nalang ang iyang armas.
Nahibaw-an kining aduna siyay armas human gi-report sa barangay tanod nga nagtinir kining og .357 revolver.
Iyang gipasabot nga depensa lang una kini niya tungod kay adunay naglagot kaniya kaniadto hinungdan nga nipalit siyag armas nga paltik.
Hinuon gitataw ni Villamater nga walay kaso nga ilang ipasaka niadtong bulontaryong mitahan.
Gani kon mahadlok sila mahimong adto lang sila mosurrender sa ilang armas sa mga barangay opisyal ug sila na ang mokuha niini nga wala gihapoy kasong atubangon.
“Hindi sila dapat matakot kasi walang kaso ang i-file sa kanila kasi voluntary surrender yan unless kung may warrant of arrest sila,” matud pa ni Villamater.
Kini gihimo usab sa kapulisan agig pangandam sa umaabot nga Pasko ug Bag-ong Tuig diin adunay mga tawo nga magpabuto sa ilang armas.