Nasunog nga firecracker factory gisira
Nipagawas og stoppage order ang Department of Labor and Employment (DOLE) 7 batok niadtong tag-iya og satellite firecracker
factory sa Barangay Babag, Lapu-Lapu City nga miulbo niadtong miaging semana.
Samtang Lapu-Lapu City Mayor Paz Radaza nakigtagbo kagahapon sa mga manufacturer ug dealer og pabuto lakip na ang barangay kapitan sa Babag nga nagpahibawo sa iyang nadawat nga kopya nga stoppage order ngadto ni Jonathan Amistad.
Base sa gihimong occupational safety and health investigation sa ahensiya ngadto miulbo nga himuanan og pabuto sa Purok Judasbelt, Babag nasuta nga daghan og nahimong kalapasan ang tag-iya.
Nasayran nga way lisensiya nga gihuptan si Amistad sa paghimo ug pagbaligya og pabuto, way fire safety inspection certificate, way business permit,
ug way hustong training alang sa paghimo og firecracker. “All these observations and deficiencies noted taken together are indicative of the Respondents laxity in implementing Safety and Health Rules within the worksite which clearly exposed the workers to an imminent danger conditions,” tipik sa natala sa maong order nga pinirmahan sa OIC-Regional Director sa DOLE 7 Cyril Ticao.
Gimanduan ang magtiayong Jonathan ug Argentina Amistad sa paghunong og himo ug pamaligya og pabuto sa higayon nga dili makatuman sa requirement sa ahensiya ingon man sa siyudad.
Kahinumduman nga niadtong Nobiyembre 22, 2017 sa hapon unom katawo lakip na sa magtiayong Amistad ang naangol atol sa pag-ulbo sa ilang himoanan og pabuto diin tulo niini mga menor de edad.
Samtang moabot sa 29 ka mga tighimo ug mamaligyaay og pabuto nga sakop sa Rambolet usa ka korporasyon/kooperatiba nga nabuhi sa paghimo og pabuto ang ni-atubang ngadto ni Radaza kagahapon.
Gikuwestiyon sa mayor ang barangay opisyal sa dihang nasuta nga aduna gihapoy hilom nga naghimo og pabuto bisan nga way permit sama sa mga Amistad.
Si Amistad di sakop sa Rambolet, apan kanhi miyembro kaniadto ug wa makapa-renew sa ilang lisensiya ning tuiga gumikan sa suliran sa panalapi.
Si barangay kapitan Epifania Augusto nipasabot nga wa sila magkuwang sa paghimangno ngadto sa ilang konstituente ilabi na nga mao kini ang nag-una nilang panginabuhian sa mga taga-Babag ug di kalikayan nga adunay uban nga mangiyawat og himo sa tago.
Ang buhatan sa city attorney nigama og kasabutan tali sa Rambolet Corp. ngadto sa ilang tagsa-tagsa ka mga miyembro nga magsilbing requirement aron nga makalukat og lisensiya o permit gikan sa barangay, City Hall ug ubang ahensiya.
Sa naasoyng paagi mamahimong legal ang ilang pag-manufacture ug pagbaligya og firecracker ug pyrotechnic.
Gikatakda nga karong Disyembre 15 magsugod na og display sa mga pabuto diha daplin sa karsada sa barangay Babag.