LILOAN, CITY OF NAGA TOP PERFORMERS BATOK DRUGS

Ang lungsod sa Liloan ug City of Naga giila nga top

performing nga lungsod ug component city sa Cebu Province nga dunay aktibo kaayong Anti-Drug Abuse Councils (ADAC). Ang duha ka local government units giila atol sa tinuig nga Our Cebu Program ug Sugbo Kontra Droga (Sukod) Awarding ceremony nga gipahigayon sa siyudad sa Sugbo niadtong Martes.

Ang Liloan, pinangulohan ni Mayor Christina Frasco, gipasidunggan isip no. 1 sa 12 ka mga lungsod sa Lalawigan sa Sugbo nga dunay aktibo kaayong Municipal Anti-Drug Abuse Council (MADAC).

Ang mga lungsod sa San Remegio ug Consolacion nagsunod nga ikaduha ug ikatulo.

Gawas sa mao nga mga lungsod, laing giila tungod sa maayo nilang mga Madac mao ang Pinamungajan, Medellin, Cordova, Tabuelan, Santander, Argao, Sogod, Madridejos ug Barili.

Samtang ang City of Naga pinangulohan ni Mayor Kristine Vanessa Chiong giilang top performer sa tulo ka component cities sa Cebu sa City Anti-Drug Abuse Councils (CADAC).

Samtang nagsunod sa ikaduha ug ikatulo ang Bogo ug Danao City. Gawas sa mga LGU, ang local police stations sa mga lungsod ug siyudad sa lalawigan giila usab sa ilang kampanya batok sa drugas.

Ang Consolacion Police Station maoy nag-una sa 12 ka municipal police units nga maayo og lakat sa ilang kampanya batok sa illegal drug campaign.

Laing police units nga giila sa Cebu Provincial Government

naglakip sa San Remegio, Liloan, Boljoon, Alcantara, Moalboal, Compostela, Ronda, Alcoy, Balamban, Sibonga ug Dumanjug.

Samtang ang Bogo City Police Station maoy nag-una sa component city police units.

Nagsunod sa Bogo City ang mga siyudad sa Danao ug Carcar.

Si Carmen Remedios Durano-Meca, pangu sa Cebu Provincial Anti-Drug Abuse Office (CPADAO), niingon nga ang mga award nag-ila sa maayong mga buhat ug programa nga gipatuman sa mga LGU ug kapulisan batok sa illegal drugs.

Naglaum si Meca nga sunod tuig dugang LGUs ang aktibong mopatuman sa ilang anti-illegal drugs program.