Pag-ban sa private cars

Nabahin ang sentimento sa publiko kalabot niining pag-anunsyo ni Cebu City Mayor Tomas Osmeña nga dili na niya paagi-on ang mga pribadong sakyanan sa Natalio Bacalso Avenue sa mga oras nga tingsakay sugod karong Lunes. Kini aron kunohay maluag-luagan ang kahuot sa dagan sa trapiko sa maong dapit ug sa samang higayon dili na makadelatar sa mga ordinaryong empleyado.

Nigrabi man gud ang kahuot sa trapiko sa nahisgutang dalan tungod niining nagpadayon nga construction sa P683- million underpass project sa Department of Works and Highways (DPWH) 7 sa may Basak-Mambaling.

Daghan man tuod ang mihangop sa pahibawo sa mayor kay lagi ang masa mao may makabenepisyo, apan di usab nato masalikway nga pipila sa atong mga kaigsuonan ang maapektohan sa maong kamanduan.

Kon tuyo niya nga dili ma- late ang mga trabahante, dili ba nga kining mga dunay pribadong sakyanan nanrabaho man usab?

Kadtong mga ginikanan nga sakay kanila ang ilang mga anak aron ihapit sa eskuwelahan kinahanglan pa ba nga ituyok nila og halayong dapit ang ilang estudiyante aron kini moabot sa destinasyon?

Kon dili na paagi-on ni Osmeña ang mga pribadong sakyanan sa naandan nga national road nga mao ang N. Bacalso Avenue, asa ug unsa man nga dalana nga maoy himuon niyang alternatibong paagi-an, nga bisan asa ka dapita karon dinhi sa siyudad moagi, pulos na man huot ang trapiko?

Daghang usab nga mga kompaniya nga anaa mahimutang sa N. Bacalso Avenue ug kadtong mga empleyado nga adunay sakyanan, asa man ni sila paagi-on ug unsaon man sab kini sila pag-ila sa mga traffic enforcers?

Buot pasabot, wa diay ni matun-i sa mayor ug basin aduna ni laing katuyoan.