Unsang ang constitutional crisis?
Sa matag higayon nga may panagbingkil sa kinatas-ang mga opisyales sa gobyerno makadungog dayon kita sa hulga sa usa ka umaabot nga constitutional crisis.
Nadungog na sab nato kini sa dihang namahayag ang usa ka kongresista nga pagasikupon si Chief Justice Maria Lourdes Sereno kon di siya motunga sa nagpadayon nga pagdungog sa kasong impeachment batok kaniya sa justice committe sa House of Representatives.
Apan unsa bang klaseha sa mananap kining constitutional crisis?
May kalambigitan kini sa atong Batakang Balaod. Ubos niini, gibahin-bahin ang gobyerno sa tulo ka mga dagkong sanga- ang ehekutiba nga maoy mopatuman sa mga balaod, ang lehislatiba nga maoy mopanday sa mga balaod ug ang hudikatora nga maoy mointerpretar sa mga balaod. Mahitabo ang usa ka constitutional crisis kon magkasungi ang duha o kaha ang tulo gyud ka mga dagkong sanga sa gobyerno kay di makalihok ang gobyerno.
Sa laktod, kinahanglan nga magtamod ang tulo ka mga sanga sa gobyerno sa mga gahom nga gilatid alang sa tagsa-tagsa kanila ubos sa atong Batakang Balaod.
Mao kana nga nipadayag sa ilang kabalaka sila si Senate Minority Leader Franklin Drilon ug Sen. Francis Escudero nga hayan mahitabo ang usa ka constitutional crisis kon sikupon si Sereno.
Matod pa sa duha way gahom ang Kongreso sa pagluwat og subpoena batok kang Sereno aron pagpugos kaniya sa pag-atubang sa impeachment hearing ug pagsikop kaniya kon magdumili siya. Ang maong gahom alang lang sa investigation in aid of legislation. Apan si Oriental Mindoro Rep. Reynaldo Umali, chairman sa House justice committee, nga maoy namahayag
niini sa usa ka radio interview, niingon nga igo lang siya nga nitubag sa usa ka hypothetical question.
Ang iyang gisaligan nga tinubdan sa maong gahom mao ang Batakang Balaod nga nagmando nga ang House of Representatives maoy mopasiugda sa tanang kaso sa impeachment. Apan nipasalig na ang mga lider sa House of Representatives nga di sikupon si Sereno, busa way constitutional crisis nga kabalak-an.
Mahitabo ang usa ka constitutional crisis kon magkasungi ang duha o kaha ang tulo gyud ka mga dagkong sanga sa gobyerno kay di makalihok ang gobyerno.