The love of my life
Buotan si Rommel. Nasuheto ko niya. Unsa man say akong rason nga balibaran ko siya? Nagpabilin ang among friendship human ko siya pakyasa sa iyang gugma nako.
“Sige, Tana kay kauwanon ra ba.”
Malipayon si Rommel sa akong pagpauban niya. Sa pikas dalan nahimutang ang Mall nga among adtoan. Sa amo nang paglabang, gikuptan ni Rommel ang usa ko ka kamot. Nakatan-aw ko niya. “No malice. It’s a friendship act, Digna.”
Nakapanglingo na lang ko ug nahikatawa. Pag-abot namo sa pikas daplin, gibuhian
na ni Rommel ang akong kamot nga iyang gikuptan. Misunod si Rommel nako sa ako nang pagsulod sa Mall. Nagsugod nag taligsik niadtong tungora. Midiretso ko sa grocery department.
Mikusog ang uwan. Wa dayon mi makapauli si Rommel kay nagsugod na sab sa pagbaha. Ingon gyud ani ang kadalanan sa siyudad kon kusog ang uwan. Magbaha dayon. “Mag-esnak sa ta, Digna.” Nakahuman na kog pangompra alang sa among inadlaw nga konsumo sa balay. Dunay fast food sa sulod ang Mall nga among nahimutangan ni Rommel.
“Sige. Gigutom na sab ko.” Kaswal lang ang akong tubag.
Samtang nagkaon mi si Rommel, nakamatikod ko nga kanuay siyang motan-aw nako.
“One week na nga tua sa Amerika si Ronron. May balita ka na ba bahin sa iyang pagpatambal niya didto?”
Nakapanghupaw ko. Nanglingu-lingo ko.
“Naghuwat bitaw ko nga motawag siya nako, Rom. Pero wa pa man gyud. Ako unta ang motawag niya pero wa man ko kahibawo sa iyang number. Lain baya ang mga cellphone
number sa laing nasod, di ba?” “Bitaw, no? Lain man diay didto ang numero sa selpon.” Nahilom si Rommel. “Kon dinhi pa siya sa ato magpatambal, Rom, unongan gyud nako siya. Ako gyud ang mobantay niya sa ospital kon i- confine siya. Ingon ana kadako ang love ko kang Ronron.”
“Suwerte kaayo si Ronron nga nakabaton og girlfriend nga tinuod gyud nga nagmahal niya.”
“Daghan ang nag-ingon nga wa nay forever love rong panahona. Pero nasayop sila. Unsa man diay ning akong gibati kang Ronron?”
“Ibutang nato, Digna, nga nagtuo ka nga forever na kanang imong gugma kang Ronron. But how about destiny?” Wa dayon ko makatingog sa gisulti ni Rommel. (SUMPAYAN)