Dugang mag-uuma giabagan sa Taiheiyo
Laing kahugpongan sa mga mag-uuma sa bukirang bahin sa San Fernando, Cebu nagsugod na karon sa pagpadako og mga kanding alang sa panginabuhi-an pinaagi sa pagpakatap sa mga liwat niini.
Inabagan sa Taiheiyo Cement Philippines, Inc. (TCPI), unom sa 39 nga sakop sa Hunat Farmers Association (HFA) nga mga lumolupyo sa Tibudban unang midawat og tagsa ka binayeng Anglo-Bower nga kanding ni’ng bag-o pa lang sa Sitio Upper sa barangay.
Nanguna nila ang ilang pangulo nga si Angelina Rita uban sa luyoluyo niini nga si Ruthgilda Saura, tig-usi sa Elizabeth Remonida, ug mga
sakop nga sila si Josephine Patambag, Erlinda Presores ug Guillerma Sasil. Gisangkapan sila sa municipal agriculturist og laking kanding nga maoy mohisa sa mga binaye harun kini makapaliwat, matod ni Vanessa N. Bongcawil, tagduma sa TCPI community relations and general affairs office.
Ubos sa panginabuhing programa, hingpit nga maangkon sa matag mag-uuma ang binayeng kanding kung makatunol kini sa HFA og duha ka binaye upat ka bulan human sa ilang pagkahimugso alang sa dugang nga pagpakatap.
Mamahimo na unya nilang maangkon ang musonod nga mahimugsong mga kanding ug ang orihinal nga binayeng nahatag nila, mibutyag si Bongcawil.
“Mahimo nilang mapadako ang mga kanding aron mapalapad ang ilang panon, alang sa ilang kan-onon, o aron mabaligya sa merkado,” siya midugang.
Gihatagan sab nilang San Fernando municipal agriculturist Nelson Soronio ug sa kaabag niyang livestock technician nga si Rommel Pinatil pagka-Enero ang mga gi-abagang maguuma sa gikinahanglang pagtudlo kung unsaon pag-alima, pagpadako ug pagpakatap sa mga kanding.
Gikati-an sa TCPI ang proyekto ubos sa Social Development Management Program (SDMP) niini, samtang mipasalig ang mga ginsakopan sa HFA nga pakan-on sa husto ang mga kanding ug ipahimutang sulod sa kamalig.
Natanyagan sab sa kompanya sa miaging unom na ka bulan og susamang pag-abag ang mga sakop sa Sitio Suico Farmers Association (SSFA) sa Barangay Tonggo, programang napatuman human sa mga nakat-onan sa 4-ka-tuig nga proyekto sa TCPI didto Bugho nga misgid sa tunga2009.
Sa naandan kaniadto ug karon, naghatagan ang TCPI og mga tambal ug bitamina alang sa mga kanding, ug nakig-alayon sa municipal agriculturist nga mabisita ang mga kanding alang sa pagpabakuna ug ubang alatimanon kabahin sa kahimsug.