Beermen coach naka-grandslam

Napili na sab si Leo Austria sa San Miguel Beermen isip Coach of the Year sa Philippine Basketball Association (PBA) Press Corps 24th Annual Awards nga ipahigayon karong gabii sa Gloria Maris restaurant sa Cubao.

Kini maoy ikatulong sunodsunod nga tuig nga nadaog ni Austria ug tungod niini, magpermanente na kaniya ang Virgilio “Baby” Dalupan trophy, nga gipangalan agi'g paghinumdom sa bantugan ug mipanaw na nga coach, kinsa gitawag og “Maestro.”

Ang Coach of the Year usa lang sa daghang awards nga ipanghatag sa PBAPC.

Si Austria, 59, maoy labing unang nakadaog sa pasidungog sulod sa tulo ka sagunson nga katuigan sa pagsugod og hatag niini niadtong 1993.

Nalupig ni Austria sa iniligay sa Coach of the Year sa miaging season sila si Tim Cone sa Barangay Ginebra Gin Kings, Nash Racela sa Talk N' Text KaTropa ug Chito Victolero sa Magnolia Hotshots (kanhi Star).

Si Austria, kinsa nagduwa sa liga sulod sa siyam ka season gikan niadtong 1985 hangtod 1993, miagak sa Beermen ngadto sa titulo sa Philippine Cup ug Commissioner's Cup.

Diriyot mahatag ni Austria ang ikaduha untang Grandslam title sa San Miguel gumikan kay nakasulod sila sa

finals sa Governor's Cup apan napakyas lang sila batok sa Brgy. Ginebra.

Si Austria nahilakip na sa grupo sa dekalibreng coaches sa kasaysayan sa PBA.