PBA nagproblema gihapon

Nagpadayon ang problema sa Philippine Basketball Association (PBA) human wala motunga ang lima ka tag-iya og teams nga nagsuporta kang commissioner Chito Narvasa sa usa ka panaghugpong niadtong Martes sa hapon.

Basi sa mga tinubdan sa Spin. ph, ang panaghugpong gipatawag sa ubang tag-iya og teams nga nagtinguhang masulbad ang kakulian sa board nga nadugkatan sa desisyon ni Narvasa nga tugtan ang trade diin nakuha sa San Miguel Beermen ang katungod sa No.1 overall

pick sa miaging rookie draft gikan sa KIA Picanto baylo sa talagra ra magamit nga mga magduduwa.

Ang pito ka tag-iya og teams nga nagtinguhang palagputon sa iyang posisyon si Narvasa pulos ningtunga sa gipatawag nga panaghugpong o kaha aduna'y mga representante.

Ningtunga sa panaghugpong mao sila si Manny V. Pangilinan, kinsa nagrepresentar sa Talk N' Text KaTropa, Meralco Bolts, ug NLEX Road Warriors, Wilfred Uytengsu sa Alaska Aces, Terry Que ug Raymund Yu sa Rain or Shine Elasto Painters, Dioceldo Sy sa Blackwater Elite ug Dennis Uy sa Phoenix Fuel Masters.

Wala'y bisan representante lang ang San Miguel, KIA, GlobalPort Batang Pier, Magnolia Hotshots ug Brgy. Ginebra Gin Kings.

Lakip sa mga isyu nga gituki sa tag-iya og teams mao ang pagtugot nga magpadayon si Narvasa nga magpadayon sa iyang posisyon sa kondisyon nga ang tanang mayorihiyang desisyon ug pinansyal nga aspeto itugyan na ngadto sa board.