DISCIPLINE ZONE IPATUMAN SAMANDAUE
Gikatakdang sugdan na sunod semana sa dakbayan sa Mandaue ang pagpatuman sa nag-unang dapit ang parte sa Brgy. Centro sa dakbayan isip usa ka “discipline zone”.
Pasabot niini nga kon anaa ka sa maong dapit, kinahanglan ka nga motuman sa tanang mga lagda sa balaud gikan sa basura, trapiko ug uban pa.
Sa tinguha nga hingpit na mawagtang ang nagkadaiyang mga krimen ug magpuyo ang katawhan sa Central Visayas ug malinawon ug hapsay nga komunidad, hinungdan nga ilusad ang discipline zone.
“During sa coordination meeting, usa sa initial nga nasabutan nga ang Brgy. Centro ang himuong pilot area kay naa man sad diha ang kasagaran sa mga tawo tungod sa merkado, mall, simbahan ug city
hall. Diha usab kasagaran mas makita ang kadaghanan sa mga di mosunod sa city ordinance,” ni PCInsp. Mercy Villaro sa dihang nahinabi sa mga tigbalita.
Paambit niya nga sagad sa mga kalapasan nga nahimo sa mga tawo sa dapit nagtuyok sa
jaywalking, iligal nga parking, basura, iligal nga mga barong-barong nga nakamugna og trapik.
Sayo ning semanaha, ang Mandaue City Police Office (MCPO) nakighimamat kang Mayor Luigi Quisumbing, sa Traffic Enforcement Agency of Mandaue, City Engineering Offive, City Environment and Natural Resources Office, Bureau of Fire Protection, City Social Welfare and Services, ug mga kapitan sa uban barangay aron hisgutan ang maong tahas.
Karong Lunes gikatakdang sugdan ang pagpatuman sa tahas sa Mandaue diin magtinabangay ang kapulisan, lokal nga kagamhanan ug nagkadaiyang ahensya sa pag-oberbar sa mga tawo sa pagtuman sa balaod.
Sumala pa ni Villaro nga tagan-an og upat ka buwan ang pagpatuman sa maong programa diin matag semana adunay ipahigayong evaluation niini.
Kon maayo ang makitang resulta, hayan palapdan kini hangtud nga malukop ang tibuok siyudad. /